«Առաջին լրատվական»-ի զրուցակիցն է ազատամարտիկ Վլադիմիր Առաքելյանը:
–Պարոն Առաքելյան, դուք և շատ այլ ազատամարտիկներ մասնակցել եք հոկտեմբերի 10-ի հանրահավաքին։ Հետաքրքիր է՝ արդյո՞ք այն սպասելիքները, որ ունեիք հանրահավաքից, արդարացվել են, և ի՞նչ կարելի է ակնկալել վաղվա հանրահավաքից, որտեղ ԲՀԿ առաջնորդ Գագիկ Ծառուկյանը պատրաստվում է որոշիչ ելույթով հանդես գալ:
–Նախ առաջինը՝ այդ քաղաքական ուժերը, որ իրար հետ միացել են, ես դա ողջունում եմ, իսկ ինչ վերաբերում է ակնկալիքներին, ապա քաղաքական ուժերն ուզում են շարժվել ժողովրդի ցանկություններով: Այսօր Հայաստանը այն վիճակում չէ: Այստեղ կապ չունի Գագիկ Ծառուկյանը, Լևոն Տեր-Պետրոսյանը կամ Րաֆֆի Հովհաննիսյանը, բոլորը պետք է միանան իրար: Վերջապես սա Հայաստանն է, սա երկիր է: Ժողովուրդը գաղթում է, անելանելի վիճակ է:
–Արդյո՞ք այդ միացման համար որևէ հստակ ծրագիր, նպատակ անհրաժեշտ չէ: Շատ ժամանակ է ժողովուրդը փողոց դուրս եկել, հիմնականում ընտրություններից հետո, և հիասթափված նորից վերադարձել տուն: Մտավախություն չկա՞, որ այս անգամ էլ ժողովուրդը կհիասթափվի:
–Ես ցավ կապրեմ, եթե ժողովրդի մոտ նորից հիասթափություն առաջանա, որովհետև սա իրականում վերջն է: Տեսեք՝ ինչ է կատարվում. եթե այս քաղաքական ուժերը ժողովրդին նորից տանեն-բերեն, բնականաբար, հիասթափություն կառաջանա: Բայց ինձ թվում է, եթե երեքը միավորվել են, ապա նրանք հուսախաբ չեն անի ժողովրդին: Երկրորդն էլ՝ այսօր ժողովուրդն այլ կերպ լինել չի կարող: Այսինքն՝ սա ինչ է նշանակում, եթե ժողովուրդը նորից հուսախաբ եղավ, ուրեմն բոլորս պետք է հեռանա՞նք Հայաստանից, երկիրը կործանենք:
–Բավականին թվով ազատամարտիկներ դեմ են քաղաքական ուժերի հետ համագործակցելուն: Ինչ-ինչ պատճառներ են բերում դրա համար, ասում են, որ բազմիցս հիասթափեցրել են ժողովրդին, և լուծումը այլ տեղ է: Ձեր կարծիքը ո՞րն է այդ մասին:
–Նույն ազատամարտիկներին կուզեմ կոչ անել… ինչ է նշանակում ազատամարտիկ բառը՝ ժողովրդի պաշտպան: Ես չեմ ընդունում այն ազատամարտիկներին, ովքեր մեկին սիրում են, մեկին չեն սիրում: Սա ընդհանուր հարց է, սա Հայաստանի հարցն է: Եթե դու ուզում ես, որ քո երկիրը նորմալ լինի, ինձ բացարձակ չի հետաքրքրում, թե Սերժը կլինի, Պողոսը կլինի կամ Պետրոսը: Ինձ հետաքրքրում է, որ Հայաստանը լինի նորմալ երկիր: Հիմա ով էլ որ գա, ինքը պետք է հասկանա, որ եթե հանկարծ ինքը ժողովրդի հանդեպ նորից ոտնձգություններ անի, ժողովրդի շահերը չպաշտպանի թե միջազգային ատյաններում և Հայաստանի ներսում, ապա այդ մարդն ով ուզում է լինի, պետք է հեռանա: Այստեղ մենք անձի խնդիր չենք դրել: Սերժը լավ կաներ հավաքեր այն տղաներին, ովքեր իրականում երկիր են ձեռք բերել, հողեր էին ազատագրել: Մենք կկանգնեինք նրա կողքին, բայց ինքը չի կարող կանգնել մեր կողքին, որովհետև օլիգարխներով էշրջապատված:
Հարցազրույցն ամբողջությամբ՝ մեր տեսանյութում։