«Բարգավաճ Հայաստան» խմբակցության պատգամավոր Գուրգեն Արսենյանի հետ «Ազատության», A1plus-ի և «Առաջին լրատվական»-ի հարցուպատասխանը։
– Պարոն Արսենյան, ի վերջո, «Բարգավաճ Հայաստան» կուսակցությունը գիտի՞, թե ուր է գնում և ինչ է ուզում:
– Վաղը ժամը 17:00-ին հրավիրում եմ Ազատության հրապարակ, որտեղ բոլորին, ովքեր մինչև այժմ տեղեկացված չեն մեր ճանապարհային քարտեզի մասին, կտրվի հստակ տեղեկատվություն:
– Ո՞րն է խնդիրը, որ «Բարգավաճ Հայաստան» խմբակցությունն անընդհատ քննարկումներ է անցկացնում: Երեկ եղավ քննարկում, եղավ երեք լիդերների հանդիպում, և սպասվում է, որ խմբակցությունն այսօր էլ է քննարկում հրավիրելու: Ի՞նչ եք այդքան քննարկում:
– Մենք քննարկում ենք ընթացիկ հարցերը, մարտավարությունը, քննարկում ենք տեխնիկական խնդիրները: Վերջիվերջո, բազմահազարանոց հանրահավաքի կազմակերպումն իր մեջ պարունակում է մի քանի բաղադրիչ: Մենք քննարկում ենք ամեն մի բաղադրիչի իրականացման հնարավորությունը, արդյունավետությունը, թե ինչպես անենք, որ ավելի կազմակերպված լինի, ավելի շատ մարդ տեղեկացված և ներգրավված լինի: Այն քաղաքական գործընթացը, որն այսօր տեղի է ունենում Հայաստանում, հանրային, քաղաքացիական դժգոհությունը, որը կա երկրում տիրող վիճակից, կառավարչական արդյունավետության հետ կապված մեր բացասական գնահատականը, այս բոլորը մենք կոնվերտացնում ենք քաղաքական գործիքներով, բարձրացնում ենք քաղաքական հարթություն, որպեսզի իշխանություններին, ովքեր պատասխանատու են երկրի, քաղաքացիների այսօրվա վիճակի համար, տեղեկացնենք, որ այսպիսի խնդիրներ կան: Որ երկրի խնդիրների նկատմամբ մի եղեք անտարբեր, անգործունյա:
– Դուք ասում եք, դո՞ւք արեք այդ գործը, թե՞ ասում եք, թողեք՝ մենք անենք:
– Մենք առաջին հերթին ասում ենք, թե այս խնդիրները կան: Եվ այդ խնդիրների ձևակերպման ու ներկայացման փուլից հետո ակնկալում ենք, որ իշխանությունները կատարեն իրենց սահմանադրական պարտականությունները: Եթե նրանք դա չեն կատարում, հանրությունն էլ տեսնում է, որ նրանք մատների արանքով են նայում այդ խնդիրներին, պարտականությունները մոռացել և օգտվում են միայն իրավունքներից, այդ դեպքում հարց է առաջանում, թե ինչի համար եք դուք, որպես իշխանություն, մնում երկրում:
– Այսինքն՝ վաղվա հանրահավաքում դուք իշխանություններին ներկայացնելու եք իրենց սահմանադրական պարտականությո՞ւնը:
– Այդ թվում:
– Վաղվա հանրահավաքում իշխանություններից հեռանալ չե՞ք պահանջելու:
– Մենք մեր գործողությունների տրամաբանությունը կառուցում ենք հետևյալ կերպ. մենք ողջամիտ մարդիկ ենք, և գնալ ու պահանջել հեռանալ, դա ամենակարճ, ամենապարզամիտ ճանապարհն է: Դու գնում և պահանջում ես հեռանալ, իշխանությունն ասում է, չեմ հեռանա: Եվ չգիտես ինչու, հիմա այդ պարզամիտ սխեման ներդրվում է հասարակության ուղեղում, թե պետք է գնալ ու անպայման ասել՝ հեռացիր:
– Դուք կարծում եք, որ իշխանությունը դեռ բա՞ն ունի անելու:
– Ցանկացած իշխանություն, դա կլինի Հանրապետական կուսակցության, թե քաղաքական այլ ուժերի կողմից ձևավորված, ունի պարտականություններ, որոնք պետք է կատարի: Դրանք սուրբ պարտականություններ են: Այդ պարտականությունների կատարման համար տրված է իրավունք: Այս իշխանությունների գործողությունների արդյունքում տեսնում ենք բալանսի շեղում՝ օգտագործում է իրավունքները, բայց դա չի անում իր պարտականությունները կատարելու համար:
– Իսկ միգուցե իշխանությունները հեռանա՞ն:
– Ես ձեզ հետ համակարծիք եմ, թող հեռանան, եթե չեն կարողանալու կատարել իրենց պարտականությունները: