Ադրբեջանական Day.az կայքին տված հարցազրույցում Ադրբեջանի Միլլի մեջլիսի պատգամավոր Խանհուսեյին Քյազըմլըն անդրադարձել է Լեռնային Ղարաբաղի հիմնախնդրին.
«Վերջապես ԵԱՀԿ-ն 80-90 տոկոսով արտացոլեց այն իրական պատկերը, որն առկա է Ադրբեջանի կորուսյալ տարածքներում: Չնայած դրան` ես չեմ բացառում, որ Հայաստանը Լեռնային Ղարաբաղին հարակից 7 շրջաններում բնակեցրած լինի ոչ թե 14.000, այլ` 24.000 վերաբնակների, քանի որ ԵԱՀԿ ներկայացուցիչները չեն շրջել բոլոր վայրերում:
Բոլորի համար ակնհայտ է, որ Երևանի այդ գործողությունները միջազգային իրավունքի տեսանկյունից համարվում են «անթույլատրելի ու ապօրինի»: Դա նաև վերաբերում է այդ շրջաններում գազային և այլ տիպի հաղորդակցությունների քաշմանը: Հայ վերաբնակներն «օգտվում» են միջազգային հանրության թողտվությունից և չեն վախենում անգամ այնտեղ տներ կառուցելուց ու գազագծեր քաշելուց:
Դրա համար էլ այժմ ԵԱՀԿ-ն պետք է առավել համաձակ քայլի գնա և Հայաստանից պահանջի այդ 7 շրջաններից հեռացնել իր վերաբնակներին:
Աշխարհի առաջատար 20 երկրներից միայն Թուրքիան է, որ ղարաբաղյան հակամարտության հարցում Ադրբեջանի նկատմամբ չի կիրառում երկակի ստանդարտների քաղաքականություն:
Ես չեմ հասկանում այն, որ միջազգային կազմակերպությունները մեզ դիմում են դիպուկահարների հետ քաշման հարցով: Բայց չէ՞ որ մենք գտնվում ենք մեր հողում, ինչը «չի կարելի» ասել Հայաստանի պարագայում:
Ադրբեջանը պատերազմի կողմնակից չէ: Մենք սպասում ենք միջազգային հանրության օբյեկտիվ վերաբերմունքին, և երբ տեսնում ենք, որ դա չկա, ի՞նչ է մնում մեզ անել»:
