Մինչ «ընդդիմությունները» զբաղված են արտահերթ կամ հերթական ընտրությունների արդար անցկացման անշարժ շարժումներով, հհկականները շարունակում են պետական «աննկատ» միջոցներ օգտագործել հօգուտ կուսակցական շահերի:
Խոսքը երեկվա այն տեղեկատվության մասին չէ, ըստ որի`Գեղարքունիքի մարզի որոշ դպրոցների մի շարք ուսուցիչներ իրենց վրդովմունքն ու մտահոգությունն են հայտնել պարտադրված կուսակցականացման վերաբերյալ…
Անգամ այն մասին չէ, որ ԱԺ նախագահը Վայոց ձորի իր աշխատանքային այցի ընթացքում գործադրի խոստումներ է տարածել սերմացուի ու պարարտանյութի խնդիրների մասին կամ համակարգիչներ է նվիրել, սահմանադրական կարգի
խախտմամբ, իր նախագահած համալսարանին /տե’ս Հ.Գ./…
Այլ այն, որ այդ աշխատանքային այցի օրակարգի մի մասը հհկական բարձրաստիճան պաշտոնյան նվիրել է իր կուսակցական ակտիվի հետ հանդիպումներին` անթաքույց խախտելով ՀՀ օրենսդրության պահանջներն, այն են` Պետական պաշտոն զբաղեցնող կուսակցության անդամն իրավունք չունի իր ծառայողական /պաշտոնեական/ դիրքն օգտագործել հօգուտ կուսակցական շահերի /»Կուսակցությունների մասին» ՀՀ օրենքի 10-րդ հոդված/:
Այդ կապակցությամբ, այսօր հերթական հաղորդումն ենք ներկայացրել Հատուկ քննչական ծառայություն հհկական բարձրաստիճան պաշտոնյայի կողմից կատարած օրինախախտման մասին:
Հ.Գ.-ԱԺ նախագահ Հովիկ Աբրահամյանի գլխավորած պատվիրակության աշխատանքային այցի օրակարգը Վայոց ձոր հագեցած է։ Խորհրդարանի ղեկավարի գլխավորած պատվիրակության կազմում են փոխվարչապետ Արմեն Գեւորգյանը, գյուղնախարար Սերգո Կարապետյանը, պատգամավորներ, կառավարության ներկայացուցիչներ։
Մարզում առաջին կանգառը Ելփին գյուղնէր։ Այստեղ Հովիկ Աբրահամյանը զրուցեց գյուղացիների հետ, ծանոթացավ նրանց խնդիրներին։ Ելփինցիներն ԱԺ նախագահին պատմեցին, որ ունեն ոռոգման ջրի խնդիր, սերմացուն ու պարարտանյութն էլ միշտ պակասում են, գյուղը չունի մանկապարտեզ, այստեղ ապրում է 350 ընտանիք 1,200 բնակչով, գյուղը գազիֆիկացված չէ։
Խորհրդարանի ղեկավարը խոստացավ ելփինցիների խնդիրներին ականջալուր լինելուց զատ դրանք պահել ուշադրության կենտրոնում եւ լուծման հարցում հետեւողական լինել։
Ելփինին հաջորդեց հանդիպումը Վայոց ձորի ՀՀԿ ակտիվի, այնուհետեւ մարզպետարանի աշխատակիցների հետ։ Քննարկման կենտրոնում դարձյալ սոցիալական խնդիրներն էին։ Պետական տնտեսագիտական համալսարանի Եղեգնաձորի մասնաճյուղին էլ Հովիկ Աբրահամյանը նվիրեց համակարգիչներ։
