Չնայած տարածքային կառավարման նախկին նախարար և փոխվարչապետ Արմեն Գևորգյանն արդեն մեկ շաբաթ է՝ հրաժարական է տվել, կառավարության այս նիստում չքննարկվեց նոր փոխվարչապետի հարցը, և այդպես էլ պարզ չէ, թե ով կարող է նշանակվել այդ պաշտոնում: Շրջանառվող տեղեկություններով՝ հավակնորդները մի քանիսն են՝ ֆինանսների նախարար Գագիկ Խաչատրյանը, տրանսպորտի և կապի նախարար Գագիկ Բեգլարյանը և կառավարության աշխատակազմի ղեկավար նախարար Դավիթ Հարությունյանը:
Այսօր կառավարության նիստից հետո տրանսպորտի և կապի նախարար Գագիկ Բեգլարյանը լրագրողների հարցին ի պատասխան, թե մամուլը գրում է, որ ինքն է լինելու հաջորդ փոխվարչապետը, ասաց. «Էդ կարգի քննարկում չի եղել, տենց բան չկա»: Հարցին, թե եթե առաջարկեն, կհրաժարվի՞, պատասխանեց. «Նախ՝ եթե առաջարկություն չկա, ուրեմն հրաժարվելու կարիք էլ չկա»: Ի պատասխան «Առաջին լրատվական»-ի դիտարկման՝ ասել է թե՝ ինքը ցանկություն ունի՞ փոխվարչապետ դառնալու, հայտարարեց. «Այսինքն՝ դուք միշտ հետևություններ եք անում սխալ»:
«Ցանկությունը իմ փոխվարչապետ դառնալու չկա»,- պնդեց Բեգլարյանը:
Մամուլում գրվել է, որ տրանսպորտի և կապի նախարարության կողմից ճանապարհաշինության ամենախոշոր պայմանագրերից մեկը` ավելի քան 452 մլն դրամ կամ շուրջ 1 մլն 100 հազար դոլար ընդհանուր արժեքով, կնքվել է «Սիսիանի ԲՈՒՍՏ» ՍՊ ընկերության հետ, որը պատկանում է ԱԺ ՀՀԿ-ական փոխնախագահ Հերմինե Նաղդալյանին: Պայմանագրային գումարի մոտ 70 տոկոսն արդեն վճարվել է, մնացածն էլ մինչև տարեվերջ կվճարվի: Տրանսպորտի և կապի նախարարին «Առաջին լրատվական»-ը հարցրեց, թե ինչպե՞ս է, որ հենց իր ՀՀԿ-ական թիմակիցն է շահել նման խոշոր մրցույթը: Սա նշանակո՞ւմ է, որ ՀՀԿ-ում իրար գործ են տալիս: «Տրանսպորտի և կապի նախարարությունում մրցույթները լինում են արդար և թափանցիկ»,- հայտարարեց Բեգլարյանը՝ հավելելով, թե շահում են նրանք, «ովքեր մասնակցում են մրցույթին և առաջարկում են նորմալ գին, նորմալ որակ»:
Ստացվում է՝ հենց ձեր թիմակիցնե՞րն են արժանի նման մրցույթներ շահելու, հարցրինք մենք: «Բավականին շատ մրցույթներ մեզ մոտ հաղթել են ոչ թիմակիցները»,- հայտարարեց Բեգլարյանը:
Մանրամասները դիտեք տեսանյութում: