Կոտայքի մարզի ընդհանուր իրավասության դատարանում Վաղինակ Մկրտչյանի նախագահությամբ ավարտվել է Շավարշ Ա.-ի (անունը փոխված է) գործի դատական քննությունը:
19-ամյա Շավարշը 3 դրվագով մեղադրվել է ՀՀ քրեական օրենսգրքի141 հոդվածով այն բանի համար, որ 2013 թվականի հունիսին, գործով չպարզված մի օր, ժամը 23-ի սահմաններում իր անչափահաս ազգականուհի՝ 1997 թվականի սեպտեմբերին ծնված Ասյայի (անունը փոխված է) հետ գտնվել է վերջինիս տան հարակից այգում և 16 տարին չբոլորած աղջկա հետ, նրա համաձայնությամբ, սեռական հարաբերություն է ունեցել:
4-5 օր անց նույն ժամին՝ ժամը 23-ի սահմաններում, Շավարշը զանգահարել է Ասյային, խնդրել է իջնել նույն այգին: Աղջիկն իջել է, և երիտասարդը դարձյալ նրա հետ, նրա համաձայնությամբ սեռական հարաբերություն է ունեցել:
Այդ հանդիպումից 10 օր հետո Շավարշը նույն ժամին նորից զանգել ու դուրս է կանչել անչափահաս աղջկան: Այս անգամ նրանք սեռական հարաբերություն են ունեցել մեքենայի մեջ:
Ընդհանուր իրավասության դատարանում Շավարշն իրեն մեղավոր չի ճանաչել: Նա հայտնել է, թե ինքն ու Ասյան ազգականներ են, բայց նրան ինքը ճանաչել է 2013 թվականի մայիսից, երբ ինքը՝ 18, իսկ Ասյան 15 տարեկան էր:
Ծանոթացել են խնջույքի ժամանակ: Ասյայից վերցրել է նրա հեռախոսահամարը: Սկսել են շփվել: Գնալով իրենց հարաբերությունները խորացել են: Ինքը Ասյայի հետ շփվել է ամուսնության նպատակով:
Իրենք հանդիպել են ցերեկային ժամերին: Մի անգամ հանդիպել են ազգականի տանը, մի անգամ կեսօրին նրան մեքենայով տուն է ուղեկցել:
Ինքը Ասյայի հետ ոչ մի անգամ սեռական հարաբերություն չի ունեցել:
Ըստ ամբաստանյալի՝ Ասյայի կողմից նկարագրված վայրը մարդաշատ է, եթե ինքը ցանկանար նրա հետ սեռական հարաբերություն ունենալ, այլ վայր կընտրեր:
Բանակ զորակոչվելու առթիվ կազմակերպված խնջույքի օրը՝ թվականի հունիսի 19-ի կեսօրին և ուշ երեկոյան՝ ժամը 23-ին, զանգել է Ասյային, որ հրաժեշտ տա: Խնջույքը տևել է մինչև գիշերվա ժամը 2-ը:Այդ ընթացքում ինքը Ասյայի հետ հանդիպման չի գնացել, դա կարող են հաստատել իրենց տան խնջույքի մասնակիցները: Միայն մի պահ տնից դուրս է եկել, հոր հետ մեքենայով քրոջն ու երեխաներին տարել է նրանց տուն: Այնտեղից մի պահ զանգահարել է Ասյային, խոսակցությունը շատ կարճ է եղել: Քրոջ սկեսրայրն իրեն տուն է հրավիրել, ինքն անջատել է հեռախոսն ու նրանց տուն է մտել:
Զինծառայության մեջ է եղել, երբ մայրը զանգահարել ու ասել է իր և Ասյայի միջև եղած սեռական հարաբերությունների մասին իրենց բնակավայրում պտտվող խոսակցությունների մասին: Ինքը մորն ասել է, որ նման բան չի եղել, ուրիշի փոխարեն ինքը պատասխան չի տալու:
Շավարշը նշել է, որ սկզբնական շրջանում ինքը Ասյայի հետ շփվել է ամուսնանալու նպատակով: Բայց մի անգամ նրան զանգել է ուրիշ հեռախոսահամարից, նա ուրիշ անուն է տվել, որից ինքը եզրակացրել է, թե Ասյան ուրիշ հետ էլ է շփվում:
Այդ զանգից հետո Ասյայի հետ այլևս չի հանդիպել, չի զանգել: Վերջին անգամ զանգել է բանակի քեֆի օրը:
Ինքը հետաքրքրվել է Ասյայի վարքագծով: Ընկերներն ասել են, թե լուրջ հարաբերություն ունենալ նրա հետ պետք չէ, չնայած դպրոցում նրա վարքագծում ոչ մի վատ բան չեն նկատել:
Իր և Ասյայի հարաբերությունները թշնամական չեն եղել: Թե ինչո՞ւ է Ասյան ասում, որ իր հետ սեռական հարաբերություններ է ունեցել, չի կարող բացատրել: Երևի մտածել է, թե ինքը ծառայության մեջ է, չի կարող ստերը հերքել, նման լուրեր տարածելու միջոցով կկարողանա ամուսնանալ իր հետ:
Ինքն արտաքին տեսքից հասկացել է, որ Ասյան անչափահաս է, բայց կոնկրետ տարիքը երբեք չի հարցրել: Քանի որ աղջիկը դպրոցական է եղել, ինքը ենթադրել է, որ նա 16-17 տարեկան է:
Անչափահաս տուժողը հայտնել է, թե սկզբում ինքն ու Շավարշը շփվել են որպես քույր ու եղբայր, բայց հետո Շավարշը խոստովանել է, որ սիրում է իրեն:
Ինքը նրան ասել է, որ իրենց կապն անհնարին է, քանի որ իրենք ազգականներ են, բայց Շավարշը պնդել է, թե սիրում է, իրենք շարունակել են շփվել հեռախոսազանգերի միջոցով:
Հունիսին, կոնկրետ օրը չի հիշում, ժամը 23-ի սահմաններում Շավարշը զանգել ու ասել է, թե իրենց տան մոտ է, ուզում է որպես եղբայր ու քույր հանդիպեն:
Ինքը սկզբում մերժել է, բայց հետո ընտանիքի անդամներից գաղտնի հագնվել ու իջել է տան հարևանությամբ գտնվող այգի: Շավարշն այնտեղ է եղել: Նա համոզել է իրեն, ստիպողաբար հանել է իր անդրավարտիքը, հետո իրենք սեռական հարաբերություն են ունեցել:
Ինքը վախեցած է եղել: Գնացել է տուն, լվացվել է ու պառկել անկողնում:
Հաջորդ օրը լվացել է տաբատը, իսկ ներքնաշորերը վառել է:
Դրանից չորս օր հետո, էլի նույն ժամին Շավարշը նորից զանգել է, ասել, թե այգում է, խնդրել է, որ հանդիպեն: Ինքը գնացել է, այնտեղ նորից սեռական հարաբերություն են ունեցել:
Երրորդ անգամ, դարձյալ հունիսին, Շավարշը զանգել է նույն ժամին, ասել է, թե հաջորդ օրը բանակ է գնում, ցանկանում է իրեն տեսնել, խնդրել է հանդիպել:
Ինքը չի մերժել նրա խնդրանքը, գաղտնի դուրս է եկել տնից: Շավարշը մեքենայով է եղել: Իրեն նստեցրել է հետևի նստատեղին, այնտեղ էլ սեռական հարաբերություն են ունեցել:
Իրենց հարաբերությունների մասին ոչ ոք չի իմացել: Բայց մի օր ընկերուհու հետ խոսակցության ժամանակ իմացել է, որ իրենց բնակավայրում խոսում են՝ իբր ինքն ու Շավարշը սեռական հարաբերություններ են ունեցել, ինքը նրանից երեխայի է սպասում: Ընկերուհուն ասել է, թե նման բան չկա:
Դրանից որոշ ժամանակ հետո մայրն է հարցրել իր ու Շավարշի հարաբերությունների մասին: Մորը պատմել է ճշմարտությունը: Թեսթի միջոցով ստուգել են, պարզվել է, որ հղի չէ:
Ինքն առաջին անգամ Շավարշի հետ է սեռական հարաբերություն ունեցել, մինչև դա կույս է եղել…
Տուժողի օրինական ներկայացուցիչը՝ նրա մայրը, դատարանում ասել է, որ աղջկան պատվազուրկ անելու համար ցանկանում են, որ Շավարշը ենթարկվի քրեական պատասխանատվության:
Շավարշի հայրը իր ցուցմունքում ասել է, թե տղայի սեռական դաստիարակությամբ ինքը չի զբաղվել, բայց երբ իմացել է կատարվածի մասին, չի հավատացել…
Ընդհանուր իրավասության դատարանը ամբաստանյալի ցուցմունքը տուժողի հետ սեռական հարաբերություններ չունենալու մասով գնահատել է որպես ոչ արժանահավատ, հաստատված է համարել նրա մեղքը մեղսագրված արարքների համար:
Շավարշը մեղավոր է ճանաչվել երեք դրվագով անչափահաս աղջկա հետ սեռական հարաբերություններ ունենալու համար և վերջին հաշվով դատապարտվել է 5 տարի ազատազրկման:
Մինչև դատավճռի ուժի մեջ մտնելը Շավարշը, որ պարտադիր զինծառայության մեջ է, կմնա զորամասի հրամանատարության հսկողության տակ: