«Անկեղծ ասած՝ ոչ մեկի հետ ոչ մի հարց չենք քննարկել, կքննարկենք այս շաբաթ»,- ասաց վարչապետ Հովիկ Աբրահամյանը՝ պատասխանելով «Առաջին լրատվական»-ի հարցին, թե, ի վերջո, ե՞րբ է նշանակելու նոր փոխվարչապետին և տարածքային կառավարման նախարարին:
Հիշեցնենք, որ անցած շաբաթ Արմեն Գևորգյանն այդ պաշտոնից հրաժարական տվեց: Եվ այս օրերին այդ պաշտոնի հավակնորդների ցանկում շրջանառվում են տրանսպորտի և կապի նախարար Գագիկ Բեգլարյանի, պատգամավոր Վարդան Այվազյանի, ինչպես նաև ֆինանսների նախարար Գագիկ Խաչատրյանի անունները: Շրջանառվում է նաև փոխվարչապետի պաշտոնը Դաշնակցությանը տալու հարցը, և ՀՅԴ-ից այդ պաշտոնի հավակնորդներից է համարվում գյուղատնտեսության նախկին նախարար Դավիթ Լոքյանը:
Իսկ լրագրողների հարցին, թե Հ. Աբրահամյանը կցանկանա՞ր, որ իր խնամի Գագիկ Ծառուկյանը դառնա նախագահ, վարչապետը նախ հակադարձեց՝ «դուք իմ խնամիների հետ ինչ գործ ունեք»: Ապա պատասխանեց. «Նախ կոռեկտ չէ հիմա նախագահի մասին խոսելը, ձեզ խորհուրդ կտամ այդ մասին չխոսել, քանի որ նախագահը 4 տարի դեռ աշխատելու է: Եվ յուրաքանչյուր քաղաքական գործիչ, ով հիմա այդ մասին խոսում է, ժամանակավրեպ է և կոռեկտ չէ»:
