Ինչպես հայտնի է՝ ՀՀ կառավարությունը շրջանառության մեջ է դրել մի օրինագիծ, որով առաջարկում է կրճատել աշխատող բոլոր հղիների՝ ներկայումս 100%-ի չափով տրամադրվող նպաստը, այն դարձնել 80%, գումար տնտեսել և չաշխատող հղիներին տրամադրել նպաստ: Չաշխատող կնոջը տրվող նպաստը, առանց հարկերի, 2016 թվականին կկազմի 275 հազար դրամ: Այսօր հղիության և ծննդաբերության նպաստ է տրվում 13 հազար աշխատող կնոջ, իսկ առաջարկվող փոփոխությունն ընդունելու դեպքում հղիության և ծննդաբերության կապակցությամբ նպաստ կստանա լրացուցիչ ևս տարեկան 30 հազար կին:
«Առաջին լրատվականի» հարցին, թե առաջարկվող փոփոխությունը հղիների իրավունքների խախտում չէ՞, ՄԻՊ գլխավոր խորհրդական Աննա Սաֆարյանն ասաց, որ մայրության նպաստի նոր կարգը կարող է հանգեցնել կնոջ իրավունքների խախտման, քանի որ այդպիսով կրճատվում են սոցիալական երաշխիքները հղի կանանց համար:
«Եթե հանրային լսումներ իրականացվեին մինչ կառավարության կողմից ընդունվելը, օրինագիծն ավելի ճիշտ կլիներ, առավել արդյունավետ կարգավորումներ կպարունակեր: Այն, որ նախատեսվում է չաշխատող կանանց փոխհատուցում, միանշանակ դա ընդունելի և ողջունելի է, սակայն դա չպետք է որևէ կերպ իրականացվի պետության սոցիալական քաղքականության կրճատման և աշխատող կանանց հաշվին»:
Կառավարությունը պարզել է, որ չնայած Հայաստանում ծնելիության կրճատմանը՝ վերջին տարիներին տրամադրվող հղիության նպաստը մոտ 4 անգամ աճել է, ինչը, ըստ կառավարության ներկայացուցիչների, պետության հաշվին գումարներ աշխատելու հետևանք է. որոշ գործատուներ վերջին ամիսներին հղիին բարձր աշխատավարձ են գրում, քանի որ դրա դիմաց փոխհատուցում է պետությունը:
«Եթե մենք չենք կարողանում ճիշտ վերահսկել որևէ ոլորտ, դրա լուծումը սոցիալական երաշխիքը կրճատելը չէ»,- այդ առթիվ ասաց ՄԻՊ խորհրդականը:
Ի դեպ, Աննա Սաֆարյանի խոսքերով՝ Հայաստանում քիչ չեն ընտանեկան բռության դեպքերը. Այս տարվա 9 ամիսների ընթացքում ընտանիքի կողմից բռնության ենթարկվելու հետևանքով ոստիկանություն է դիմել 1500 կին:
Դիտեք «Առաջին լրատվականի» հարցազրույցը ՄԻՊ գլխավոր խորհրդական Աննա Սաֆարյանի հետ: