ԱՄՆ նախագահ Բարաք Օբաման CBS հեռուստաալիքին տված հարցազրույցում անդրադարձել է մերձավորարևելյան վերջին զարգացումներին, հատկապես Լիբիային և Սիրիային: Օբաման ասել է, թե ինքը չի կարող պատկերացնել, որ այն հանգամանքները, որոնք ստիպեցին կոալիցիային ռազմական գործողություններ սկսել Լիբիայում, կարող են մեկ այլ տեղ կրկնվել: Միաժամանակ շեշտել է, որ Լիբիայի իրադարձությունները պետք է դաս լինեն Մերձավոր Արևելքի երկրների կառավարությունների համար, որոնք պետք է հարգեն քաղաքացիների հիմնական ազատությունները:
Նա նշել է, որ «Լիբիայի օրինակը յուրահատուկ է», և Սիրիա նմանատիպ ներխուժման մասին խոսք լինել չի կարող: Ըստ ԱՄՆ նախագահի` Քադաֆին սկսեց սպանել սեփական ժողովրդին, ինչը դատապարտվեց միջազգային հանրության կողմից, իսկ գործելու մանդատը տրվեց նաև արաբական երկրների կողմից:
Լիբիայի հարցով Լոնդոնում կայացած կոնֆերանսի ժամանակ Սիրիայի հարցին անդրադարձել է նաև ԱՄՆ պետքարտուղար Հիլարի Քլինթոնը, որը սուր քննադատության է ենթարկել Սիրիայի կառավարության գործողությունները` անթույլատրելի համարելով ցուցարարների դեմ զինվորականներին օգտագործելու նրանց որոշումը: Այս մասին հաղորդում է Reuters գործակալությունը: Քլինթոնի հայտարարության ոգով հանդես է եկել նաև Ֆրանսիայի արտաքին գործերի նախարար Ալեն Ժյուպեն, որը կոչ է արել Սիրիայի կառավարությանը բանակցություններ և երկխոսություն սկսել սեփական ժողովրդի հետ: Թեպետ Ժյուպեն քննադատել է խաղաղ բնակչության դեմ բռնություններ կիրառելը, սակայն հավելել է, որ պատժամիջոցների մասին դեռ խոսք չի գնում:
Հիշեցնենք, որ մարտի 18-ից Սիրիայում սկսվել են բախումներ հակակառավարական ուժերի և իրավապահների միջև, որի հետևանքով, տարբեր տվյալներով, զոհվել է 60-120 մարդ: Մարտի 29-ին Սիրիայի կառավարությունը հրաժարական է տվել, իսկ այսօր սպասվում է, որ Սիրիայի նախագահ Բաշար Ալ-Ասադը կներկայացնի կառավարության նոր կազմը:
