«Առաջին լրատվական»-ի զրուցակիցն է «Հանրապետական» խմբակցության պատգամավոր Սամվել Նիկոյանը
– Պարոն Նիկոյան, Սերժ Սարգսյանը սահմանադրական փոփոխությունների հայացակարգի մասին իր կարծիք հայտնելն ինչո՞ւ տեղափոխեց եկող տարվա փետրվար-մարտ ամիսներ:
– Բազմիցս ասվել է, որ մինչև այժմ դա գտնվում է սահմանադրական իրավունքի մասնագետների՝ նախագահի կողմից ստեղծված հանձնաժողովի գործողությունների տիրույթում, որի ավարտից հետո միայն սկսվում են քաղաքական քննարկումների և հայեցակարգից արդեն շատ ավելի կոնկրետ՝ նախագծի ստեղծման փուլերը: Ընդամենը հայտարարվել է, որ առաջին փուլն ավարտված է, և սկսվում է երկրորդ փուլը: Երկրորդ փուլը, այսինքն՝ քաղաքական քննարկումների համար որևէ ժամկետ սահմանված չէ: Իսկ դա բավականին տարողունակ խնդիր է, պետք է փորձել բոլոր քաղաքական ուժերի հետ համաձայնեցնել, քննարկել, թե ինչպիսին են տեսնում մեր երկրի Սահմանադրությունն ապագայում, բավականին ժամանակատար խնդիր է, և կարծում եմ, որ այդ ժամկետը կարող է բավարար չլինի:
– Այդ հայեցակարգի մասին Վենետիկի հանձնաժողովի եզրակացության մեջ նշված է, որ սահմանադրական փոփոխությունների համար անհրաժեշտ է քաղաքական կոնսոլիդացիա: Բայց տվյալ դեպքում ոչ իշխանական ուժերը դեմ են այդ փոփոխություններին, և հայտնի չէ, թե գոնե Դաշնակցություն կուսակցությունը կպաշտպանի՞ իշխանությունների նախաձեռնած այդ փոփոխությունները: Նման պայմաններում իշխանությունները կգնան սահմանադրական փոփոխություններին:
– Բնական է, որ խոսքը դեռ հայեցակարգին է վերաբերում: Իսկ հայեցակարգից մինչև նախագիծ դեռ ճանապարհ կա անցնելու: Եվ այս փուլում քան դեռ մանրամասներ հստակեցված չեն, լայն կոնսոլիդացիայի մասին խոսելը անհնար է: Այո, մենք գտնում ենք, որ կա հանրային կոնսոլիդացիայի անհրաժեշտություն, վերջիվերջո, հանրությունը պետք է քվեարկի սահմանադրական փոփոխությունների օգտին: Այդ պատճառով էլ մենք գտնում ենք, որ պետք է քաղաքական լայն քննարկումների և համաձայնությունների փուլով անցնենք: Եվ այդ ժամկետն անհրաժեշտ է, որ բոլոր քաղաքական ուժերի՝ լինի դա խորհրդարանական կամ ոչ խորհրդարանական, հասարակական կազմակերպությունների և հասարակության հետ քննարկում անցկացնել, որ կարողանանք նախագիծը ներկայացնել: Ընդդիմության պահանջը որևէ ձևով չի կարող անդրադառնալ այդ ժամկետների վրա: Այդ ժամկետներն անհրաժեշտ են բոլորի հետ քննարկում անցկացնելու համար:
– Այսինքն՝ պետք է քննարկեք այն քաղաքական ուժերի հետ, որոնք դե՞մ են այդ փոփոխություններին:
– Սահմանադրական փոփոխություններին դեմ լինել՝ չիմանալով ինչի մասին է խոսքը, կարծում եմ, այնքան էլ ճիշտ չէ: Միգուցե, նրանք այդ փոփոխություններում այնպիսի առաջարկներ են անում, որոնք իրենց պատկերացումների մեջ են: Ինչո՞ւ չքննարկել բոլորի հետ, եթե նույնիսկ մինչև այժմ ունեն մերժողական վերաբերմունք։
– Բայց այդ ուժերը դեմ են ոչ թե որոշակի սկզբունքներին, այլ դեմ են ընդհանրապես փոփոխություններին, քանի որ կարծում են, թե այդպիսով Հանրապետական կուսակցությունը և Սերժ Սարգսյանը ցանկանում են վերարտադրվել:
– Բայց բոլորին բազմիցս պատասխան է տրվել, թե ինչն է խանգարում այս Սահմանադրությամբ իրականացնել այդ վերարտադրությունը: Աշխարհում կա՞ մի ուժ, որը չի ցանկանում վերարտադրվել: Իսկ իրենք՝ ընդդիմադիր ուժերն ինչո՞ւ են պատրաստվում ընտրություններին, ինչո՞ւ են հայտարարում արտահերթ ընտրությունների մասին, ինչո՞ւ են քարոզչությամբ զբաղվում և այդ ուղղությամբ մեծ գումարներ ծախսում: Աշխարհում բոլոր քաղաքական ուժերն էլ ցանկանում են ընտրությունների միջոցով գալ իշխանության կամ պահել իրենց իշխանությունը:
