Մարտի 29-ին Լոնդոնում տեղի է ունեցել Լիբիայի հարցով կոնֆերանս, որին մասնակցել են ավելի քան 4 տասնյակ երկրների և միջազգային կազմակերպությունների ներկայացուցիչներ: Ռուսաստանն ու Չինաստանը, որոնք ձեռնպահ էին մնացել ՄԱԿ-ի Լիբիայի հարցով 1973 բանաձևի ընդունման ժամանակ, կոնֆերանսին չէին հրավիրել: Այս մասին հաղորդում է BBC-ն:
Կոնֆերանսի ժամանակ որոշում է կայացվել ստեղծել համակարգող խումս, որի իրավասությունների մեջ է մտնում Լիբիայի հարցով քաղաքական որոշումների կայացումը. «Կոնֆերանսի մասնակիցները համաձայնել են ստեղծել Լիբիայի հարցով համակարգող խումբ: Այդ խումբը պետք է քաղաքական քայլեր ձեռնարկի ՄԱԿ-ի, Աֆրիկյան միության, Արաբական երկրների լիգայի, «Իսլամական կոնֆերանս» կազմակերպության և Եվրամիության հետ, որպեսզի աջակցի Լիբիային, հարթակ ստեղծի Լիբիայում միջազգային ուժերի գործողությունները համակարգելու համար»,- հայտարարել է Մեծ Բրիտանիայի արտաքին գործերի նախարար Ուիլյամ Հեյգը: Սակայն, ինչպես նշում են մասնագետները, դեռ պարզ չէ, թե ինչպես է գործելու այս «ճգնաժամային շտաբը» և ինչ լիազորություններ է ունենալու:
Խմբի առաջին նիստը որոշված է անցկացնել Քաթարում: Կոնֆերանսի մասնակիցները նաև որոշել են շարունակել ռազմական գործողությունները այնքան, քանի դեռ չեն կատարվել ՄԱԿ-ի Անվտանգության խորհրդի բանաձևի պահանջները: Մասնակիցները հանդիպման ավարտին կոչ են արել Լիբիայի առաջնորդին հրաժարվել իշխանությունից և լքել երկիրը. «Մենք կոչ ենք անում Քադաֆիին ու նրա կողմնակիցներին լքել (երկիրը.– 1in.am) և հետագայում արյունահեղություն չհրահրել: Ես կարծում եմ, որ սա մոտ ապագայի համար միակ հնարավոր որոշումն է: Այս հույսը, որը մենք հիմա տալիս ենք, երկու օրից կարող է վերանալ բանակցությունների սեղանից»,- ասել է Քաթարի վարչապետ և արտաքին գործերի նախարար Համադ բեն Ջասեն Ալ-Թանին:
