Երեկ մենք տեղեկացրել էինք, որ մի խումբ ահաբեկիչներ իրաքյան Տիկրիտ քաղաքում, որը նախկին բռնապետ Սադամ Հուսեյնի ծննդավայրն է, բազմաթիվ պատանդներ են վերցրել քաղաքի վարչական շենքերից մեկում: Ընդ որում, ահաբեկիչներն օգտվել էին այն հանգամանքից, որ մեկ այլ մահապարտ ահաբեկիչ իրեն պայթեցրել էր վարչական շենքի մուտքի մոտ` խուճապ առաջացնելով շենքը հսկող իրավապահների շրջանում: Դրանից հետո ահաբեկչական խումբը պատանդ էր վերցրել մի քանի տասնյակ մարդու:
Իրավապահների կողմից սկսված օպերացիայի ժամանակ, երբ նրանք փորձել են ազատել պատանդներին, ահաբեկիչներն անմիջապես գործի են դրել պայթուցիկները` սպանելով շենքում եղած մարդկանց: Ըստ որոշ տվյալների` ահաբեկչության զոհ է դարձել ավելի քան 56 մարդ, մոտ 100 մարդ ստացել են տարբեր աստիճանի մարմնական վնասվածքներ: Այս մասին հաղորդում է CNN-ը: Իրաքի ներքին գործերի նախարարության տվյալներով` զոհվածների մեջ են 4 տեղական խոշոր պաշտոնյա, ոստիկանության ղեկավարը և մեկ լրագրող: Հայտնի է, որ զոհված լրագրողը եղել է Reuters գործակալության աշխատակից: 30-ամյա Սաբահ Ալ-Բազին գործակալությունում աշխատել է 2004 թվից, ինչպես նաև որպես օպերատոր համագործակցել է մի շարք այլ ընկերությունների հետ:
Դեռ հայտնի չէ, թե որքան մարդ է եղել ահաբեկչական խմբում: Իրավապահներն այս պահին վերահսկում են իրավիճակը Տիկրիտում: