Սերժ Սարգսյանը այսօր այցելել է Հատուկ քննչական ծառայությանը հատկացված նոր շենք և ծառայության աշխատակիցների հետ հանդիպման ընթացքում ըստ էության դրական և խրախուսական գնահատական տվել՝ ըստ որում, շեշտելով, որ ոչ բոլոր գերատեսչություններին է ինքը նման գնահատականներ տալիս:
Սա ըստ էության կարելի է որակել որպես Հատուկ քննչական ծառայությանը տրված քարտ-բլանշ, միևնույն ժամանակ նաև ինչ-որ առումով նախազգուշացում պետական կառավարման մյուս բոլոր գերատեսչություններին՝ այն իմաստով, որ ՀՔԾ-ն զբաղվում է պետական պաշտոնյաների կատարած օրինախախտումներով և հանցագործություններով: Այսպիսով Սերժ Սարգսյանը փորձում է պետական կառավարման համակարգը պահել վերահսկողության տակ, համակարգի սեգմենտներին ցույց տալ, որ «ինքնագործունեությունը» կարժանանա Հատուկ քննչական ծառայության ուշադրությանը:
Որևէ կասկած լինել չի կարող, որ հարկ եղած դեպքում ՀՔԾ-ն ցանկացած պետական գերատեսչության, ցանկացած պաշտոնյայի մասով կգտնի անհրաժեշտ հիմքերը՝ հարուցելու քրեական գործեր: Եթե ոչ մի բան էլ չնշենք, միայն Վերահսկիչ պալատի ուսումնասիրությունները բավարար են, որպեսզի Հատուկ քննչական ծառայությունը գործի անցնի ցանկացած ոլորտում, ցանկացած պաշտոնյայի դեմ: Եվ այս տեսանկյունից Սերժ Սարգսյանի այցն ու հայտարարությունները անկասկած ուղղված են կառավարման համակարգը ձգելուն:
Թե ինչու է Սերժ Սարգսյանը նման անհրաժեշտություն զգացել՝ երևի դժվար չէ գլխի ընկնել: Սրանում կա երկու պատճառ. մի կողմից՝ սրվում են ներհամակարգային հակադրություններն ու մրցակցությունը, ինչը արտահայտվում է ոչ իշխանական ուժերի գործողությունների որոշակի ինտենսիվացմամբ, մյուս կողմից՝ Հայաստանը հայտնվում է ավելի ու ավելի բարդ տնտեսական իրավիճակում, նաև՝ պայմանավորված Ռուսաստանի իրավիճակի հետ: Այս երկու խնդիրները իրար հետ փոխկապակցված են և չեն բացառվում այս փոխկապակցվածության ընթացքում առանձին պետական գերատեսչական օղակներում որոշակի սաբոտաժի դեպքերը, ինչը, բնականաբար, ծանր հարված կլինի Սերժ Սարգսյանի դիրքերին:
ՀՔԾ-ին տրված գնահատականները, որոնք, ըստ էության, ինչ-որ առումով կարող են նաև ՀՔԾ-ն մարտական պատրաստության բերելու հրաման դիտվել, ակնհայտորեն նպատակ ունեն նախազգուշացնել պետական կառավարման համակարգին և կանխարգելել հնարավոր սաբոտաժները կամ ցույց տալ, որ դրանք կկանխարգելվեն շատ խիստ և օպերատիվ:
Այս խնդիրը Սերժ Սարգսյանի համար առավել հրատապ է նաև մեկ այլ առումով: Նա պատրաստվում է փետրվար-մարտին իր կարծիքը, վերջնական որոշումը հայտնել Սահմանադրական փոփոխությունների հայեցակարգի կապակցությամբ, այսինքն՝ կա՛մ կանաչ ճանապարհ տալ փոփոխությունների գործընթացին, կա՛մ չեղյալ հայտարարել դա: Սերժ Սարգսյանի որոշումը կախված կլինի նաև նրանից, թե ինչքանով նա վստահ կլինի պետական կառավարման համակարգի վերահսկելիության հարցում:
