«Քաղաքացիական հասարակության ինստիտուտ» ՀԿ խորհրդի նախագահ Արտակ Կիրակոսյանը չի բացառում, որ առաջիկա հանրահավաքներում ճնշումներ լինեն ոստիկանության կողմից: «Ոստիկանությունը չնայած առաջընթաց ապրել է ցույցերի ժամանակ իրեն պահելու առումով, բայց բացառված չեն, որ կարող են լինել պրոբլեմներ, հատկապես այդ պրոբլեմները մարզերում են լինում»,- «Առաջին լրատվական»-ի հետ զրույցում ասաց իրավապաշտպանը:
«Առաջին լրատվական»-ի հարցին, թե իր կարծիքով՝ Գագիկ Ծառուկյանի ղեկավարած շարժումը կարո՞ղ է ժողովրդավարության տանել, ժողովրդավարական արժեքներ կրել, Ա. Կիրակոսյանը պատասխանեց. «Այն արժեքները, որոնք Ծառուկյանինն են, ես դրանց մասին կա՛մ չգիտեմ, որովհետև ինքը դրանց մասին չի խոսում, կա՛մ, եթե իր գործողություններով դատես, ոչ մի էդպիսի բան չկա: Եթե նույն էս ցույցերին պետք է բարեգործական ավտոբուսներով մարդկանց բերեն, ոչ մի բանով իշխանության ոճից չեն տարբերվում»:
Իրավապաշտպանի խոսքով՝ քաղաքական կուսակցությունները ցանկանում են ոչ թե աշխատել, այլ գտնել հովանավոր. «Եթե դու ուզում ես երկրում ժողովրդավարություն բերել, քո կուսակցության ներսում պետք է ժողովրդավարություն լինի»:
Դիտեք «Առաջին լրատվական»-ի հարցազրույցը «Քաղաքացիական հասարակության ինստիտուտ» ՀԿ խորհրդի նախագահ Արտակ Կիրակոսյանի հետ: