Պարզվում է, որ ՀՀ Կապի և տրանսպորտի նախարարությունը, որի վրա դրված են Հայաստանում հենց կապի ապահովման գործառույթները, չի հետաքրքրվում այն հանգամանքով, որ երեկ ժամեր շարունակ Հայաստանի մեծ մասը զրկված էր ինտերնետ կապից:
Նախարարության հասարակության հետ կապերի բաժնից մեզ խորհուրդ տվեցին խոսել Կապի վարչության պետի տեղակալ Նելլի Թարխանյանի հետ, որն էլ իր հերթին նշեց, որ ավելի լավ է մեր հարցն ուղղենք հենց վարչության պետին: Վարչության պետ Գևորգ Բալոյանն էլ, ուշադրությամբ լսելով, մեր հարցը պատասխանեց. «Դուք ավելի լավ է զանգահարեք տեղեկատվական վարչություն»:
Երբ մենք նշեցինք, որ հենց տեղեկատվական վարչությունից են խորհուրդ տվել խոսել իր հետ, Բալոյանը պատասխանեց. «Ես տեղյակ չեմ, դա ինտերնետի հետ կապված է, և դրա մասին բոլոր հարցերը իրենց մոտ է գտնվում: Ես ուղղակի տեղյակ չեմ, եթե տեղյակ լինեի, մեծ սիրով կօգնեի»:
Ի վերջո հասարակության հետ կապերի բաժնից մեզ փոխանցեցին, որ վթարը տեղի է ունեցել վրացական կողմում և պատճառները վրացական կողմը չի ներկայացրել, իսկ հայաստանյան մատակարարները ինտերնետ սպասարկում իրականացրել են պահուստային կապուղիների հաշվին. «Մենք հիմա գիտենք, որ Վրաստանն արդեն ամբողջովին վերականգնել է կապը»:
Ի դեպ, վրացական կողմի հետ նման խնդիրները կարգավորելու լիազորություն նախարարությունը չունի:
«Մենք նման լիազորություն չունենք, որովհետև ինտերնետ կապը մատակարարների տիրույթում է, մենք ընդամենը կարող ենք տեղեկանալ և Ձեզ տեղեկացնել, իսկ մանրամասն ուսումնասիրություն կատարելը իրենց լիազորությունն է»,- «Առաջին լրատվականին» տեղեկացրին Կապի և տրանսպորտի նախարարության հասարակության հետ կապերի բաժնից: