Հայաստանի մեծածախ ինտերնետ մատակարար «ԱրմենՏել» ընկերության հասարակայնության հետ կապերի ծառայության ղեկավար Անուշ Բեղլոյանի խոսքերով, երեկ Հայաստանում ինտերնետ կապի բացակայության պատճառը հանդիսացել է Գորիս-Թբիլիսի մայրուղու մոտ գտնվող մալուխի ֆիզիկական վնասվածքը: Միառժամանակ վթարվել և դադարել են աշխատել երեք կապուղի` «Տելեսորեա», «Յութիչի» և «ՍովԻնտել»: Որը սակայն, ըստ Բեղլոյանի, վրաց մասնագետները 2,5 ժամում վերականգնել են:
«Վերջին անգամ այդպիսի վթար եղել է մոտ երկու տարի առաջ: Սովորաբար այդ կապուղիները միաժամանակ չեն կտրվում: Վրաստանի տարածքից դուրս դրանք տարանջատվում են և Սև ծովի հատակով անցնում են առանձին-առանձին և այդ իսկ պատճառով շատ հազվադեպ է լինում, որ այդպիսի մեծ վթար լինի: Այս անգամ վթարը եղել է հենց Վրաստանի տարածքում»,- նշեց Բեղլոյանը:
Նա ցավ հայտնեց, որ Հայաստանի բնակչության ինտերնետ օգտագործողների մեծ մասը տուժեց այդ ընթացքում:
«ԱրմենՏելը» ինտերնետ կապ ստանում է նաև Իրանից: Սակայն, ըստ Բեղլոյանի, բաժանորդների ներկայիս քանակությունն այնքան մեծ է, որ մեկ կապուղին չի կարող բավարարել:
Անուշ Բեղլոյանի խոսքերով, եթե վթարը երկար տևեր, իրենք տրաֆիկը անմիջապես կվերաուղղորդեին այլ կապուղիների վրա. «Այդ դեպքում մեր բաժանորդները կունենային ինտերնետ, բայց ավելի դանդաղ` այլ կապուղիների հաշվին»:
Մյուս խոշոր մեծածախ ինտերնետ մատակարար Fibernet Communications-ի լրատվական բաժնից ևս տեղեկացրին, որ վթարվել էր Վրաստանից Հայաստան եկող մալուխը: