Երեկ կայացավ չեմպիոնների լիգայի 4-րդ տուրի 8 հանդիպում:
E խմբում «Բազել»-ը ընդունեց «Ռոմա»-ին, իսկ «Կլուժ»-ը` «Բավարիա»-ին:
Հռոմեացիները, գիտակցելով, որ միայն հաղթանակի դեպքում նրանք կրող են պայքարի մեջ մնալ, միանգամից գործի անցան: Արդեն 17-րդ րոպեին Ժերեմի Մենեզը բացեց խաղի հաշիվը, իսկ 25-րդ րոպեին Տոտին 11-մետրանոցից կրկնապատեց հանդիպման հաշիվը: Սակայն շվեյցարական թիմը ոչ մի կերպ չհաշտվեց պարտվելու մտքին, եւ թիմի լավագույն ռմբարկու Ալեքսանդր Ֆրայը 69-րդ րոպեին կրճատեց հաշիվը: Բայց արդեն 76-րդ րոպեին Գրեկոն հաշիվը դարձրեց 3-1, եւ «Բազել»-ին միայն հաջողվեց նորից կրճատել հաշիվը: Աչքի ընկավ Շաչիրին:
Իսկ ահա «Կլուժ»-«Բավարիա» խաղում գերմանացիները 4 անպատասխան գնդակ ուղարկեցին ռումինացիների դարպասը: Հեթ-տրիկի հեղինակ դարձավ Մարիո Գոմեսը, եւ մեկ անգամ էլ աչքի ընկավ Պատրիկ Մյուլլերը: «Բավարիա»-ն արդեն ձեռք է բերել փլեյ-օֆֆի ուղեգիր:
F խմբի երկու հանդիպումներում ընդհանուր առմամբ գրանցվել է 12 գնդակ: «Չելսի»-ն հյուրընկալելիս 4-1 հաշվով հաղթանակի հասավ Մոսկվայի «Սպարտակ»-ի նկատամամբ: Առաջին խաղակեսից հետո հաշիվը 0-0 էր , սակայն արդեն 49-րդ րոպեին Անելկան մեն-մենակ դուրս եկավ Դիկանի հետ ու մեկ հպումով բացեց խաղի հաշիվը: 62-րդ րոպեին Մակեեւը սեփական տուգանային հրապարկում խախտեց կանոնները Դրոգբայի հետ պայքարում, եւ գլխավոր մրցավարն առանց հապաղելու նշանակեց 11-մետրանոց: Հենց Դրոգբան էլ դիպուկ իրացրեց 11-մետրանոցը: 4 րոպե անց ստանդարտ դիրքի խաղարկումից հետո սերբ պաշտպան Իվանովիչը գլխի հարվածով հաշիվը դարձրեց 3-0: Սակայն մոսկվացիներին հաջողվեց հեղինակության գոլ խփել, աչքի ընկավ փոխարինման ելած Նիկիտա Բաժենովը, բայց այդ օրը Իվանովիչը ուղղակի փայլում էր, նրան հաջողվեց եւս մեկ անգամ աչքի ընկնել արդեն ավելացրած ժամանակում: Խմբի մյուս հանդիպման ժամանակ Մարսելի «Օլիմպիկ»-ը ուղղակի ջախջախեց «Ժիլինա»-ին` 7-0 հաշվով: Հեթ-տրիկի հեղինակ դարձավ Անրի Ժինյակը, երկու անգամ աչքի ընկավ Լուչա Գոնսալեսը, եւ մեկական անգամ էլ` Ռեմին եւ Հայնցեն:
G խմբում անցավ տուրի կենտրոնական հանդիպումը: «Միլան»-ը Սան Սիրոյում ընդունեց «Ռեալ»-ին: Խաղից առաջ արքայական ակումբի գլխավոր մարզիչ Ժոզե Մաուրինյոն նշել էր, որ ինքն ամենաշատը խաղադաշտում չի ուզում տեսնել Ֆիլիպո Ինձագիին: Հանդիպումն անցավ թեժ պայքարում: 24-րդ րոպեին Կրիշտիանո Ռոնալդուն կրկին ապացուցեց, որ ինքը նաեւ հիասքանչ դերասան կարող էր դառնալ, սակայն մրցավարը նրան չհավատաց, երբ նրա կրծքավանդակը Աբատեն փոքր-ինչ «շոյեց», իսկ պորտուգալացին բոլորին ուզում էր ապացուցել, իբր թե դեմքին հարված է ստացել: Հանդիպումն ավարտվեց 2-2 հաշվով: 45-րդ րոպեին Իգուաինը բացեց խաղի հաշիվը, բայց փոխարինման ելած Ֆիլիպո Ինձագին 10 րոպեում դարձավ 2 գոլի հեղինակ, սակայն արդեն 90-րդ րոպեին Դե Լիոնին հավասարեցրեց խաղի հաշիվը: Խմբի մյուս խաղում «Օսեր»-ը հաղթանակ է տարել «Այաքս»-ի նկատմամբ` 2-1 հաշվով:
H խմբում էլ Հենրիկ Մխիթարյանի «Շախտյոր»-ը անսպասելիորեն պարտության մատնեց «Արսենալ»-ին` 2-1 հաշվով: 10-րդ րոպեին Վոլկոտին հաջողվեց բացել խաղի հաշիվը: 28-րդ րոպեին Չիգրինսկին դարձավ պատասխան գոլի հեղինակը, իսկ ահա 43-րդ րոպեին «Արսենալ»-ի նախկին հարձակվող Էդուարդո Դա Սիլվան հաղթանակ պարգեւեց հանքափորներին: Մյուս խաղում «Բրագա»-ն պարտության մատնեց «Պարտիզան»-ին` 1-0 հաշվով, միակ գոլի հեղինակ դարձավ բրազիլացի պաշտպան Մոյզեսը: Ընդհանուր առմամբ, 8 խաղում գրանցվել է 31 գնդակ:
