«Նուբարաշենի աղբավայրի խնդիրը շատ լուրջ է, և մենք փորձում ենք դա ուշադրության կենտրոնում պահել, քանզի այն վտանգավոր է ոչ միայն Երևանի, այլև ամբողջ արարատյան դաշտավայրի, շրջակա գյուղերի համար. որովհետև աղտոտվում են և՛ ստորգետնյա, և՛ վերգետնյա ջրերը»,- լրագրողների հետ հանդիպման ժամանակ նշեց Հանրային խորհրդի անդամ, բնապահպան Կարինե Դանիելյանը:
Նա նշեց, որ քաղաքապետարանը միայնակ չի կարող լուծել այս մեծ խնդիրը, և սրանով պետք է զբաղվի կառավարությունը: Դանիելյանի խոսքերով, անհրաժեշտ է անհապաղ միջոցներ կիրառել. «Օպերատիվորեն պետք է մեկուսացնել աղբավայրը, բայց դա վերջնականապես հարցը չի լուծի, քանզի աղբավայրն այնպիսի վիճակում է, որ այդ թույները պետք է դուրս բերվեն ու ոչնչացվեն»:
Դանիելյանը կարևորեց նաև քաղաքաշինության և էկոլոգիայի խնդիրը. «Երևանում ընթացող վերջին տասը տարվա քաղաքաշինությունը և՛ հակաէկոլոգիական է, և՛ հակասոցիալական է, և՛ սեյսմիկ առումով խիստ վտանգավոր է»:
Բնապահպանի խոսքերով, ինքը խնդիրը ներկայացրել է Երևանի քաղաքապետ Կարեն Կարապետյանին, որն էլ հայտարարել է, թե այլևս ոչ մի կանաչ տարածք չի կառուցապատվի, բակային տարածքները և կենտրոնը չեն կառուցապատվելու և բարեկարգվելու են: Ըստ Դանիելյանի, այս ամենը շատ դրական է, սակայն դեռևս ամբողջովին կարգավորված չէ: Եվ, որպես օրինակ, բնապահպանը նշեց, որ հենց ներկա պահին Կողբացի 42 և Պուշկինի 40 հասցեներից բնակիչները բողոքել են, որ բակի ամբողջ տարածքը քանդված է և կառուցապատում են. «Բնակիչները բողոքում են, ցույցեր ու պիկետներ են անում, սակայն դա չի օգնում, և, ցավոք, համաձայնությունը ստորագրել է գործող քաղաքապետը 2010 թ. դեկտեմբերի 30-ին»:
Դանիելյանը տեղեկացրեց, որ կանաչ տարածքների պահպանության խնդիր կա Մոնումենտում, Վիշապների այգում և գլխավոր պողոտայում, որտեղ կառուցապատումներ են իրականացվում առանց համապատասխան լսումների, որոնք, սակայն, պետք է լինեին: «Միթե այդ քաղաքապետարանում մեկը չգտնվեց, որ նոր եկած քաղաքապետին ինֆորմացիա տար, թե ինչ պարտավորություններ ունի քաղաքապետարանը` օրենքն է պահանջում լսումներ, մեր միջազգային պարտավորություններն են պահանջում լսումներ»,- հավելեց Կարինե Դանիելյանը:
