«Բոլորը հիշում են, որ մենք քառյակով ունեինք պայմանավորվածություն՝ ամփոփելու 12 կետերը: Նախկին մեր քննարկումների ժամանակ այս հարցը քննարկվել է, և մենք առաջարկել էինք, որ յուրաքանչյուր խմբակցություն իր ամփոփումները կատարի, որպեսզի քառյակի նիստով մենք վերջնական միասնական փաստաթուղթ ունենանք: Մենք դիմեցինք մեր գործընկերներին, թե՝ օրերը մոտենում են, ունենք հստակ պայմանավորվածություն՝ ամփոփելու և վերջնական գնահատական տալու: Եվ պայմանավորվեցինք հոկտեմբերի 8-ին, ժամը 10:30-ին, քառյակով հանդիպելու և ձևակերպելու, համադրելու վերջնական եզրակացությունը: Պայմանավորվել էինք հանդիպել Դաշնակցություն խմբակցությունում»,- «Առաջին լրատվական»-ի հետ զրույցում ասաց ՀՅԴ խմբակցության ղեկավար Աղվան Վարդանյանը:
Ինչպես հայտնի է, այսօր ոչ իշխանական եռյակի ուժերը հերթական նիստն են անցկացրել, որից հետո «Ժառանգություն» խմբակցության ղեկավար Ռուբիկ Հակոբյանը լրագրողների հետ հանդիպման ժամանակ հայտարարեց, որ վաղը առավոտյան կտարածեն իշխանություններին ուղղված 12 կետերից բաղկացած պահանջների կատարման գնահատականը: Սակայն այդ գնահատականը լինելու է եռյակի անունից, և ՀՅԴ-ն դրան չի միանալու:
«Ցավոք, նախորդ օրը մեզ տեղեկացրին, թե քանի որ զբաղված են և չեն հասցնում, կողմնակից են գրավոր աշխատանքին: Մենք ձեզ փոխանցենք եռյակի կողմից կազմված փաստաթուղթը, ծանոթացեք, և եթե առաջարկություն ունեք, կխոսենք: Այս մասին ես խոսել եմ և «Ժառանգության» ներկայացուցչի, և «Բարգավաճ Հայաստան»-ի ներկայացուցիչների և ՀԱԿ-ի ներկայացուցչի հետ»,- շարունակեց Ա. Վարդանյանը:
Արդյունքում եռյակի ուժերը ՀՅԴ-ին փոխանցել են իրենց ամփոփիչ տեքստը, ՀՅԴ-ն էլ իր հերթին է ինչ-որ տեքստ է ուղարկել՝ այդ երկուսը համադրելու համար: Հավանաբար արդեն եռյակում ՀՅԴ-ի տեքստի հետ համաձայնություն չի եղել, և այդ ուժերը որոշել են, որ 12 կետերի գնահատականը կհնչեցնեն իրենք՝ երեք ուժերով: Իսկ ինչո՞ւ եռյակը չի ընդունել ՀՅԴ-ի առաջարկները և ինչո՞ւ է վաղը այդ գնահատականներն հնչեցնելու առանց ՀՅԴ-ի կարծիքի: Ռ. Հակոբյանը մեզ հետ զրույցում ասաց, որ իրենք այսօր նիստի ժամանակ քննարկել են այդ հարցը: «Եղան տարբեր մոտեցումներ, բայց վերջնական մոտեցումը, որ եռյակը ձևավորեց, այն էր, որ դա պետք է հնչեցվի եռյակի անունից»,-ասաց Ռուբիկ Հակոբյանը: