ՄԻԵԴ-ում Հայաստանի դատավորի ընտրության մրցույթի հարցազրույցի փուլը երեկ երեկոյան ժամը մոտ 19:40-ի սահմաններում ավարտվել է: Հարցազրույցին մասնակցել է 11 թեկնածու: Արդարադատության նախարարության լրատվական ծառայության պատասխանատու Ծովինար Խաչատրյանը «Առաջին լրատվական»-ի հետ զրույցում ասաց, թե, ամենայն հավանականությամբ, մրցութային հանձնաժողովն այսօր կհրապարակի, թե թեկնածուներն ինչ միավորներ են ստացել, և ովքեր են երեք հաղթող թեկնածուները: Այդ երեք թեկնածուների անունները ներկայացվելու են Սերժ Սարգսյանի հաստատմանը, որն էլ, իր հերթին, դրանք ուղարկելու է ԵԽԽՎ՝ վերջնական ընտրության: ԵԽԽՎ-ն այդ երեքից մեկին պետք է ընտրի ՄԻԵԴ-ում ՀՀ դատավոր:
Ընդ որում՝ մրցույթի արդյունքների մասին հանձնաժողովի հրապարակումը լինելու է պարզապես հաղորդագրության տեսքով: Այսինքն՝ հանձնաժողովը չի պատրաստվում դրա համար հավաքվել Վճռաբեկ դատարանում և այն բանավոր հայտնել թեկնածուների, դիտորդների և լրագրողների ներկայությամբ, ինչպես անցած երկու օրերին անցկացնում էր մրցույթը: Մինչդեռ Ծ.Խաչատրյանը երեկ մեզ հետ զրույցում հայտնեց, որ հանձնաժողովը հավաքվելու է, և մրցույթի արդյունքները բանավոր կերպով են հրապարակվելու, որին կարող ենք ներկա լինել նաև մենք: Իսկ թե այս ընթացքում ինչո՞ւ հանկարծ հանձնաժողովը մտափոխվեց, ի՞նչ տեղի ունեցավ մի գիշերվա ընթացքում՝ դժվար է ասել: Գուցե հանձնաժողովը որոշել է աչք փակել բոլոր տիպի խախտումների վրա և պարզապես գրավոր հայտնել իշխանությունների համար ցանկալի երեք թեկնածուների անուննները: Գուցե հանձնաժողովի անդամներն այդպիսով ցանկանում են խուսափել իրենց համար անցանկալի հարցերին պատասխանելուց:
Հայտնի է միայն, որ երեկ հարցազրույցի փուլի ավարտին՝ երեկոյան ժամը մոտ 19:40-ին, հանձնաժողովը հեռացել է դահլիճից, հանձնաժողովի նախագահ՝ Սահմանադրական դատարանի նախագահ Գագիկ Հարությունյանն ասել է, որ 15 րոպեից կվերադառնան, բայց այդպես էլ չեն վերադարձել: Եվ այդքան ժամանակ հանձնաժողովի անդամներ՝ Գ.Հարությունյանը, արդարադատության նախարար Հովհաննես Մանուկյանը, գլխավոր դատախազ Գևորգ Կոստանյանը, վճռաբեկ դատարանի նախագահ Արման Մկրտումյանը, ՄԻ պաշտպան Կարեն Անդրեասյանը և արդարադատության ակադեմիայի ռեկտոր Ռուբեն Մելիքյանը, որոշել են, թե ինչպես գնահատեն թեկնածուներին:
Իսկ երեկվա սկանդալն էլ այն է եղել, որ թեկնածուներից Կենտրոն և Նորք-Մարաշ վարչական շրջանների ընդհանուր իրավասության դատավոր Արայիկ Մելքումյանը գիշերը՝ 22:45-ի սահմաններում, մտել է Վճռաբեկ դատարանի շենք, իսկ դատական կարգադրիչները նրան ուղեկցել են հանձնաժողովի մոտ: Թե հանձնաժողովի անդամներն ինչ են քննարկել Ա.Մելքումյանի հետ՝ հայտնի չէ: Ծ.Խաչատրյանն այսօր մեզ ասաց, թե մրցույթի արդյունքների հետ հաղորդագրության մեջ կլինեն պարզաբանումներ նաև Ա.Մելքումյանի՝ գիշերը Վճռաբեկ դատարանի շենք մտնելու և ընդհանրապես ամբողջ մրցույթի մասին:
Նշենք նաև, որ երեկ, երբ Ա.Մելքումյանը դատարանում էր և պատրաստվում էր մասնակցել հարցազրույցին, մենք կարողացանք նրան մի քանի հարց ուղղել, թե ինչպե՞ս է եղել, որ ինքն իր դիմումը արդարադատության նախարարություն անձամբ է ներկայացրել, բայց չի ստորագրել համապատասխան գրանցամատյանում: Եվ ինչպե՞ս է եղել, որ անձամբ ներկայացնելու դեպքում իր անունը հայտնվել է փոստով ուղարկվածների հատվածում: Վերջինս, սակայն, չցանկացավ պատասխանել, իսկ սրահում ներկա աշխատակիցները նրան պարզապես փախցրին լրագրողների ձեռքից, որ անցանկալի հարցեր չտրվեն:
Հիշեցնենք, որ արդարադատության նախարարությունից «Իրավունքների Եվրոպա միավորման» ստացած տվյալների համաձայն՝ թեկնածուներից երեքի՝ Ա.Մելքումյանի, նախկին օմբուդսմեն Արմեն Հարությունյանի և Նորա Կարապետյանի դիմումները ստացվել են սահմանված ժամկետից՝ սեպտեմբերի 24-ի ժամը 18:00-ից ուշ, ինչը հակասում է Ս.Սարգսյանի՝ ՄԻԵԴ-ում ՀՀ դատավորի ընտրության մրցութային հանձնաժողով ստեղծելու մասին հրամանագրին: Եվ այսքանից հետո չի բացառվում, որ Ա.Մելքումյանը, ինչու չէ՝ նաև նույն խախտումներով, ժամկետից ուշ դիմումներ ներկայացրած Արմեն Հարությունյանը կամ Նորա Կարապետյանը հայտնվեն հաղթող ճանաչված երեք թեկնածուների շարքում: Չէ՞ որ նրանք ակնհայտորեն արդեն վայելում են մրցութային հանձնաժողովի համակրանքը: