Միքայել Նալբանդյանի անվան Գյումրու պետական մանկավարժական ինստիտուտի ռեկտոր Վարդևան Գրիգորյանը ԲՀԿ-ական է: Մեր ունեցած տեղեկություններով՝ այսօր նա հրահանգել է դասախոսական կազմին, ուսանողներին՝ մասնակցել ոչ իշխանական եռյակի հանրահավաքին:
«Առաջին լրատվական»-ի հետ զրույցում ռեկտորը հերքեց նշված տեղեկատվությունը. «Ես երբեք նման հրահանգ չեմ տվել և չեմ էլ տալու, քանի որ այս տարիների ընթացքում ես հնարավորինս աշխատել եմ մանկավարժական բուհը հեռու պահել քաղաքականությունից: Եթե ամբողջ մանկավարժական բուհը 6000 անդամ ունի և ընդամենը 10-ն են ԲՀԿ անդամ, դա արդեն ամեն ինչի մասին խոսում է: Չկա նման բան, իսկ ով ցանկություն ունի, ես ոչ մեկին չեմ արգելելու»,- հավելեց Վարդևան Գրիգորյանը:
Անդրադառնալով Վանաձորում ԲՀԿ-ականների կողմից ամբողջական իշխանափոխության պահանջին, ինչը ենթադրում է նաև ԿԳ նախարար Արմեն Աշոտյանի հրաժարականի պահանջ, ռեկտորը նշեց, որ ինքը ԲՀԿ անդամ է, պարզ է, որ ԲՀԿ որոշումը՝ որպես անդամի, իր համար սուրբ պարտականություն է կատարել:
«Կրկնում եմ՝ ո՞նց կարող ես լինել կուսակցության անդամ և համաձայն չլինես կուսակցության որոշմանը, ուրեմն դու պետք է հրաժարական տաս: Ես կուսակցության բարեխիղճ անդամ եմ»:
Նա նաև նշեց, որ կմասնակցի հոկտեմբերի 10-ի հանրահավաքին, բայց ոչ աշխատանքային ժամերի հաշվին: