Հայաստանի և Ադրբեջանի համար աշխարհաքաղաքական հարմար իրավիճակ է զիջումների մի մեծ շրջան սկսելու համար: «Առաջին լրատվական»-ի հետ զրույցում այս մասին ասաց ՌԴ Պետդումայի նախկին պատգամավոր, ՌԴ քաղաքական հետազոտությունների կենտրոնի ղեկավար, ՌԴ հանրային պալատի ներկայացուցիչ, քաղաքագետ-տնտեսագետ Սերգեյ Մարկովը՝ անդրադառնալով ադրբեջանական լրատվամիջոցներում իր անունից հրապարակված այն տեղեկությանը, թե Հայաստանը, Ռուսաստանն ու Ադրբեջանն ակտիվորեն բանակցում են ԼՂ հակամարտության խաղաղ կարգավորման շուրջ:
Նա հստակեցրեց իր միտքը՝ ասելով, որ հետզհետե հարմար քաղաքական իրադրություն է ստեղծվում զիջումների մի մեծ շրջանի համար: Ըստ նրա՝ Հայաստանը միանում է եվրասիական պրոյեկտներին, Հայաստանին անհրաժեշտ է ապաշրջափակում, իսկ այդ համաձայնությունն ըստ էության կլուծի այդ խնդիրը:
Ռուսաստանցի գործչի համոզմամբ՝ այդ զիջումների էությունը հետևյալն է՝ Հայաստանը վերադարձնում է յոթ շրջանները, որի դիմաց Ադրբեջանն ու Թուրքիան վերացնում են Հայաստանի շրջափակումը: «Այս զիջումն, ըստ իս, տեսանելի է երկու կողմերի համար էլ, բայց դա ժամանակավոր լուծում է, քանի որ չի հստակեցվում ԼՂ կարգավիճակի հարցը: Այնուամենայնիվ, սա ստեղծում է ԼՂ հակամարտության խաղաղ կարգավորման դրական բանակցությունների և համաձայնության հիմք, միևնույն ժամանակ կողմերն են դրական տրամադրվում գործընթացի նկատմամբ»,- մեկնաբանեց Սերգեյ Մարկովը:
Հարցին՝ ո՞ր կողմն է առաջարկում լուծման այս տարբերակը, քաղաքագետն արձագանքեց՝ ասելով, որ այս լուծումը որևէ մեկը դեռ չի առաջարկում: «Ես պարզապես ասել եմ, թե կարծում եմ՝ դրա համար պայմաններ են ստեղծվում: Սա դեռ ամենավաղ փուլն է, այսպես ասած, այս գործընթացի: Նախկինում սա հնարավոր էր միայն տեսականորեն, իսկ այսօր նաև գործնականում»,- ասաց Սերգեյ Մարկովը:
Խոսելով Հայաստանի եվրասիական ինտեգրացիայի խնդիրներից՝ նա նշեց, որ անկախ խնդիրներից՝ ավարտվում է Հայաստանի՝ ԵՏՄ անդամակցության գործընթացը: Սակայն, նրա խոսքով, մեծ վստահություն չկա այն հարցում, որ Հայաստանը հոկտեմբերի 10-ին կմիանա եվրասիական ինտեգրացիոն պրոյեկտներին:
«Հարցն այն է, որ Հայաստանի որդեգրած կուրսը վախվորած է: Արևմուտք-Ռուսաստան դիմակայության ընթացքում Հայաստանը վախենում է համարձակ կերպով որդեգրել պրոռուսական դիրքորոշում: Այժմ իրավիճակը բավականին անկանխատեսելի է, երբ ավարտվի ուկրաինական ճգնաժամը, կարծում եմ՝ կարելի է այդ ժամանակ սպասել որոշակի հստակության, որպեսզի Արևմուտքի և Ռուսաստանի միջև պատերազմի նոկաուտի ազդեցությունը Հայաստանի նկատմամբ զգալի չլինի»,- նշեց Սերգեյ Մարկովը:
Հիշեցնենք, որ Ռուսաստանի, Ղազախստանի և Բելառուսի կողմից ստեղծվող Եվրասիական տնտեսական միության (ԵՏՄ) անդամների թիվը կաճի: Այս մասին հայտարարել էր ՌԴ նախագահ Վլադիմիր Պուտինը՝ հիշեցնելով, որ ԵՏՄ-ին Հայաստանի անդամակցումը վերջնական փուլում է: