Օքսֆամի հայաստանյան մասնաճյուղը Եվրոպական միության քառամյա ֆինանսավորմամբ Հայաստանում իրականացնում է պարենային անվտանգությանն առնչվող ծրագիր: Օքսֆամի հայաստանյան գրասենյակի տնօրեն Մարգարիտա Հակոբյանի խոսքով՝ ծրագիրը դեռ նոր է մեկնարկել, շատ հետազոտություններ դեռ նոր են արվում, և դեռ վաղ է վերջնական պատկերացում կազմել առկա խնդիրների վերաբերյալ:
«Պարենային անվտանգությունը շատ կարևոր ոլորտ է ամբողջ աշխարհում: Այն բաղկացած է շատ կարևոր 4 կոմպոնենտներից՝ պարենի հասանելիություն, մատչելիություն, իրացում և սննդամթերքի անվտանգություն: Ծրագրի հիմնական նպատակն է նաև խթանել տեղական արտադրությունը»,- ասաց տիկին Հակոբյանը:
Ինչ վերաբերում է սննդամթերքի անվտանգությանը, ապա տիկին Հակոբյանի խոսքով՝ այս ծրագրի ընթացքում շեշտադրում է արվելու հատկապես սննդի անվտանգությանը, թե մեր բնակչությունն ինչ սնունդ է իրացնում:
Հակոբյանից հետաքրքրվեցիքն՝ ուսումնասիրություն կատարվե՞լ է, թե ներկրվող ապրանքների դեպքում արդյոք մակնշումը պատշա՞ճ է կատարվում, թե տվյալ ապրանքը ի՞նչ է պարունակում, որպեսզի զերծ մնանք, ասենք, ԳՓՕ-ով հարստացված սննդամթերքից: «Այդ ուղղությամբ մենք դեռ շատ չենք խորացել, բայց իսկապես՝ և ներկրման, և արտահանման դեպքում այս ստանդարտների, նորմերի պահպանումը շատ կարևոր է, որպեսզի բնակիչն իմանա՝ ինչ է ուտում»:
Մարգարիտա Հակոբյանի խոսքով՝ հույս կա, որ Մաքսային միությանը Հայաստանի անդամակցումից հետո սննդամթերքի անվտանգության չափանիշները կպահպանվեն՝ ինչպես ԵՄ-ի հետ աշխատած ժամանակ: «Կարծում եմ՝ Մաքսային միությունում ևս ստանդարտներ կլինեն: Դա արդեն ցույց կտա ապագան, թե Հայաստանը որ նորմերին, որ ստանդարտներին ավելի շատ կհամապատասխանեցնի իր տեղական արտադրությունը, և ներկրումն ու արտահանումը կլինեն դրան համահունչ»:
Իսկ ՄՄ-ի ստանդարտները համահունչ կլինե՞ն ԵՄ-ի առաջարկած ստանդարտներին՝ հարցին նա պատասխանեց. «Այսօրվա դրությամբ այդքան խիստ չեն դրված հատկապես արտահանման հետ կապված ստանդարտները, բայց հետագայում դրանք ավելի խիստ ու ավելի պարտադրելի կդառնան ու գուցեև չտարբերվեն եվրոպական ստանդարտներից»: