Կրեմլի մամուլի ծառայությունը երեկ հաղորդագրություն է տարածել Մինսկում կայանալիք Եվրասիական տնտեսական միության գագաթնաժողովին Վլադիմիր Պուտինի մասնակցության մասին, որում սակայն ոչ մի խոսք չկա օրակարգում Հայաստանի անդամակցության պայմանագրի վերաբերյալ: Ըստ որում` օրակարգային այլ հարցերի մասին հաղորդագրությունում նշվում է:
Ի՞նչ է նշանակում այս ամենը: Հայաստանի անդամակցության հարցը օրակարգից հանվա՞ծ է, թե՞ պարզապես ներկայացված օրակարգն ամբողջական չէ: Եթե ամբողջական չէ, ապա, ըստ էության, ստացվում է, որ Կրեմլի համար Հայաստանի անդամակցության հարցը այնքան էլ էական հարց չէ, հիշատակման ոչ արժանի:
Իսկ երեկ Վլադիմիր Պուտինին ծննդյան օրվա առիթով շնորհավորելով` Սերժ Սարգսյանը շնորհավորական ուղերձում հատուկ ընդգծում էր իր շնորհակալությունը Հայաստանի Եվրասիական միությանն անդամակցելու հարցում Պուտինի ջանքերի կապակցությամբ:
Մինչդեռ, ըստ էության, ստացվում է, որ Պուտինի համար այդ հարցն այնքան էլ կարևոր հարց չէ: Եվ եթե կարևոր չէ ու հիշատակման ոչ արժանի, եթե իհարկե հարցը օրակարգից հանված չէ, կնշանակի, որ Ռուսաստանի իշխանության համար ներկա պահին, ըստ էության, մեկ է՝ Հայաստանը կդառնա անդամ, թե չի դառնա:
Վերջիվերջո` Ռուսաստանի համար ամենակարևոր հարցը լուծվել է, և ըստ էության Հայաստանը կտրվել է Եվրամիությունից, Եվրամիության հետ ասոցացման հնարավորությունից: Ավելին` Եվրամիությունը Հայաստանի հետ նոր հարաբերություններ մշակելու համար սպասում է Եվրասիական միությանն անդամակցության պայմաններին, որպեսզի հասկանալի դառնա, թե Հայաստանի հետ հարաբերությունների ինչ հնարավորություններ են մնում, ինչ եզրեր:
Այսինքն` եթե Հայաստանը չի անդամակցում, ապա այս հարցը, հետևաբար նաև Եվրամիության հետ հարաբերությունների նոր փաթեթի մշակման հարցը ևս կախված է մնում օդից: Այսինքն` բավական չէ Կրեմլը տապալել է Հայաստանի Ասոցացման համաձայնագիրը, այսօր էլ Եվրասիական միությանը Հայաստանի անդամակցության ձգձգումով, ըստ էության, արգելակած է պահում Եվրամիության հետ նոր հարաբերությունների մշակումը:
Պարզ է, որ Ռուսաստանի համար այսպես ավելի կարևոր խնդիրներ են լուծվում Հայաստանի հետ կապված, քան Հայաստանի անդամակցությամբ: Եվ զարմանալի չի լինի, եթե Հայաստանի անդամակցությունը կամ իսկապես հերթական անգամ հետաձգվի, կամ եթե նույնիսկ ստորագրում տեղի ունենա, ապա հետաձգվեն մի շարք պայմաններ և դրույթներ` ըստ էության շարունակելով պահպանել անորոշությունը: