Այսօր հանրապետությունում նշվում է գրադարանավարի օրը: Երևանի քաղաքապետ Տարոն Մարգարյանը գրադարանավարի օրը նշեց Ավետիք Իսահակյանի անվան գրադարանում՝ աշխատակիցների հետ: Որպես օրվա նվեր քաղաքապետը հայտարարեց, որ հունվարի 1-ից Երևանի բոլոր գրադարանավարների աշխատավարձը կբարձրանա 15 տոկոսով: Նա նաև նշեց, որ արդեն 2015թ. քաղաքապետարանի համայնքային բյուջեից գումար կտրամադրվի, որպեսզի վերանորոգվեն քաղաքի բոլոր գրադարանները:
Օրվա համատեքստում «Առաջին լրատվական»-ը քաղաքապետից հետաքրքրվեց, թե որն է նրա կարդացած վերջին գիրքը: «Ռանչպարների կանչը»,- եղավ Տարոն Մարգարյանի պատասխանը:
Թեմայից դուրս քաղաքապետից հետարքրքվեցինք նաև, թե որքան է այս տարվա Էրեբունի-Երևան տոնակատարության բյուջեն: «Եթե չեմ սխալվում՝ 130 միլիոն դրամ նախատեսվել է համայնքային բյուջեից մշակութային միջոցառումների համար, 50 միլիոն՝ դրա սոցիալական ծրագրերի համար: Բայց ֆինանսավորման հիմնական, առյուծի բաժինը մեր հովանավորների, գործընկերների միջոցով է իրականացվում»,- ասաց Տարոն Մարգարյանը:
