«Առաջին լրատվական»-ի զրուցակիցն է ՀՀ ԿԳ նախարար, ՀՀԿ փոխնախագահ Արմեն Աշոտյանը:
– Երեկ Վանաձորում ոչ իշխանական ուժերի հանրահավաքին ԲՀԿ որոշ անդամների շուրթերից հնչեցին ամբողջական իշխանափոխության պահանջներ: Դուք մինչ այդ հերքում էիք նման հնարավորությունը: Ըստ էության՝ ԲՀԿ-ն գնում է ամբողջական իշխանափոխությա՞ն, ի՞նչ կարծիքի եք:
– Ես երկար ժամանակ է՝ փորձում եմ չանդրադառնալ Եռյակի քաղաքական տեսակետներին՝ սևեռվելով բացառապես կրթական օրակարգի վրա: Այսօր շատ հետևողական էիք հարցազրույցի հարցում և երկու բառ ասեմ, քանի որ այլընտրանք չունեմ այս պարագայում:
Այլընտրանքային դեգերումները պետք է մի օր ավարտվեին, և ակնհայտ է, որ դիլեման՝ այս կամ այն կողմ, պետք է լուծում ստանար: Վանաձորում ԲՀԿ երկրորդ դեմքի շուրթերով հնչեց ԲՀԿ դիրքորոշումը՝ Հայաստանի քաղաքական դաշտում ամեն ինչ ավելի պարզ և դասական դարձավ: Մնում է հուսալ, որ մեր քաղաքական գործընկերները հետևողական կլինեն իրենց նոր քաղաքական կեցվածքի մեջ և, օրինակ, Ազգային ժողովի առաջիկա նիստին կհայտարարեն իրենց ընդդիմադիր լինելու մասին:
Միաժամանակ պետք է նաև ասեմ, որ շատ են անձնական վիրավորանքները: Կարծում եմ՝ ԲՀԿ-ն, որպես Եռյակի հիմնական շարժիչ ուժ, պարտավոր է իր և իր քույր կուսակցությունների հռետորների նկատմամբ ավելի ուշադիր լինել, որովհետև անձնական վիրավորանքների լեզվով քաղաքական պայքար մղելը կտրուկ իջեցնում է քաղաքական մշակույթի մակարդակը Հայաստանում, էլ չասեմ, որ իր արդյունավետության տեսանկյունից խիստ կասկածելի է, մասնավորապես՝ ՀՀԿ-ի հետ նման լեզվով խոսելը քաղաքական մազոխիզմ է:
– Հոկտեմբերի 10-ին ի՞նչ ակնկալիքներ կան: Մենք տեսնում ենք, որ մարդաշատ են նրանց հանրահավաքները:
– Ես առանձնապես չեմ հետևել հանրահավաքներին հավաքված մարդկանց քանակին, բայց դա ՀՀ քաղաքացիների իրավունքն է, այդ թվում՝ հանրահավաքների տեսքով արտահայտել իրենց քաղաքական տեսակետները, և այստեղ որևէ պարսավելի գործընթաց չկա: Մարդիկ ըմբոշխնում են իրենց քաղաքական ազատությունը, և սա ժողովրդավար լինելու հիմնական արդյունքներից մեկն է:
Ինչ վերաբերում է հոկտեմբերի 10-ի հանրահավաքին, դրան հետևող իրադարձություններին, ապա ես կարծում եմ, որ հանրային արձագանքը՝ լինի տեղեկատվական դաշտում, նույն սոցիալական ցանցերում, հանրահավաքների ժամանակ ելույթների նկատմամբ մեկնաբանությունը, մեղմ ասած, շատ զուսպ է և երբեմն տարակուսած ու թերահավատ: Կարծում եմ, որ դա լավագույն պատասխանն է:
– Ի՞նչ եք կարծում՝ մարդը կամ այն ուժի ղեկավարը, որին է պատկանում քաղաքին ամենամոտ գտնվող խաղատունը, որի գործերը միշտ հաջող են գնացել և այսօր էլ՝ այս իշխանության օրոք ևս շատ հաջող են, կարո՞ղ է դնել իշխանափոխության պահանջ՝ նկատի ունեմ Գագիկ Ծառուկյանին:
– Ես զերծ եմ մնում այս պահին մեկնաբանել ԲՀԿ ղեկավարի հետ կապված որևէ հարց, որովհետև քանի որ իրենք դարձել են կամ դառնում են ընդդիմադիր, ապա ապագայում ես կունենամ այդ հնարավորությունը:
