Երեկ չեղարկվել են Air Armenia-ի միանգամից մի քանի չվերթ՝ դեպի Սանկտ Պետերբուրգ, դեպի Մոսկվա, Աթենք և այլ ուղղություններով: Պատճառն ավիաընկերությունում ծագած ֆինանսական խնդիրներն են: Ավիաընկերությունը մոտ 5 միլիոն դոլար պարտք է այն ընկերությանը, որից 2 օդանավ է գնել և գումարը չի տվել: Բացի այդ, հսկայական պարտքեր ունի նաև «Զվարթնոց» օդանավակայանին: Իրավիճակն այն աստիճան է սրվել, որ Դուբայի այն ընկերությունը, որն օդանավեր է վարձակալությամբ տվել ավիաընկերությանը, հետ է վերցրել դրանք, ինչի պատճառով էլ ավիաընկերությունը չեղյալ է հայտարարել իր թռիչքները: Air Armenia-ն այս պահին միայն մեկ օդանավ ունի։
«Առաջին լրատվական»-ի տեղեկություններով, երեկ այս հարցի հետ կապված քաղավիացիայի գլխավոր վարչության պետ Արտյոմ Մովսիսյանի մոտ հանդիպում-քննարկում է եղել Դուբայի համապատասխան ընկերության ներկայացուցչի հետ: Բանակցությունները տարել են այն բանին, որ օդանավերը վերադարձվեն, Air Armenia-ն շարունակի թռիչքները, որպեսզի կարողանա մարել կուտակած պարտքը: Թե ինչ որոշում է կայացվել քննարկումների արդյունքում՝ դեռ հայտնի չէ, սակայն եթե մերժվի օդանավերը վերադարձնելը, ապա Air Armenia-ն կգնա «Արմավիայի» ճանապարհով: Այսինքն՝ այս ավիաընկերությունը ևս սնանկ կհայտարարվի:
Մենք փորձեցիքն Air Armenia-ի սեփականատեր, կառավարության աշխատակազմի ղեկավար-նախարար Դավիթ Հարությունյանի եղբորից՝ Վահան Հարությունյանից ճշտել, թե ինչո՞վ են պայմանավորված ընկերությունում առաջացած խնդիրները, ինչո՞ւ են չվերթերը հետաձգվել, ինչպե՞ս է ավիաընկերությունը կուտակել այդքան պարտք և, վերջիվերջո, ի՞նչ ճակատագիր կունենան իր կամպանիան, սակայն նա հրաժարվեց խոսել մեզ հետ: Ասաց, որ շատ զբաղված է և ոչ մի հարցի պատասխանելու ժամանակ ու ցանկություն չունի:
Ավիաընկերությունից, սակայն, մի քանի օր առաջ, ի պատասխան մեր նախորդ հրապարակման, հաղորդագրություն էին տարածել՝ նշելով, որ «ընկերությունը լավ ժամանակներ չի ապրում»: