Երեկ, ըստ էության, որոշակի պայմանավորվածություններ են ձեռք բերվել վերջին օրերին մեծ աղմուկի պատճառ դարձած շրջանառության հարկի կիրառումից բողոքող առևտրականների և կառավարության միջև: Ըստ էության, համաձայն այդ պայմանավորվածության, որոշում է կայացվել օրենքի կիրառումը հետաձգել մինչև 2018 թվականի փետրվարի 1: Սա շատ հետաքրքրական ժամկետ է: Եվ ահա թե ինչու:
«Շրջանառության հարկի մասին» օրենքն ընդունվեց հունիսին և ընդունվեց, այսպես ասած, բոլորի համար ընդունելի «վարչապետ օպերացիայի» շնչով: Այդ օրենքին ոչ միայն իշխանությունները, այլ նաև ոչ իշխանական ուժերը, մասնավորաբար ԲՀԿ-ն էր կողմ քվեարկում: Իսկ առևտրականներն էլ, չգիտես ինչու, ոչ մի բողոքի ձայն չբարձրացրին, ոչ մի հանրահավաք և ցույց չեղավ, ոչ իշխանական ուժերն էլ ոչ մի կերպ չփորձեցին գլխի գցել, թե ինչ վտանգավոր օրենք է ՓՄՁ-ների համար:
Եվ ահա, մոտենում է օրենքի կիրառման, և ուշադրություն դարձրեք՝ զուգահեռ նաև ոչ իշխանական ուժերի հայտարարած հանրահավաքային սեզոնի ժամկետը, և սկսվում են սոցիալական բողոքներ, դժգոհություններ, որոնք մի քանի օր շարունակվում են, մեծ աղմուկ են հանում և հոկտեմբերի 6-ին վարչապետի և այսպես ասած ցուցարարների պատվիրակության «տղայական», լրագրողների աչքից հեռու զրույցի ընթացքում ավարտվում են, ըստ էության, հետաձգելու մասին ընդհանուր հայտարարով՝ մինչև փետրվարի 1: Եվ այս ժամկետով հետաձգումը շատ հետաքրքրական է:
Ի՞նչ ամիս է Հայաստանում փետրվարը: Այո՛, փետրվարը ձմռան վերջին ամիսը լինելով` ըստ էության, քաղաքական գարնան նախաշեմն է հանդիսանում: Արդեն մի քանի տարի Հայաստանում քաղաքական սեզոնը մեկնարկում է փետրվարին և, որպես կանոն, մեկնարկում է հանրահավաքային եթե ոչ գործողություններով, ապա ազդագրերով:
Եվ ուրեմն` «Շրջանառության հարկի մասին» օրենքը հետաձգում են մինչև փետրվար, երբ մեկնարկելու է քաղաքական գարունը, և ըստ էության կլինի հարմար խթանի կարիք: Իսկ սա իսկապես հարմար խթան է, ինչպես ցույց տվեցին վերջին օրերը: Խնդիրն այն է, որ թեժ աշունը, բնականաբար, պետք է ուղեկցվի ձմեռային դադարով` ելնելով Հայաստանում սեզոնային քաղաքականության պրակտիկայից: Ձմեռային դադարից հետո բոլորը, բնականաբար, լավ սառած կլինեն, և փետրվարից առաջ տաքացնելու, այսպես ասած, կայծի կարիք կլինի: Ըստ էության, Հովիկ Աբրահամյանն ու ցուցարարների պատվիրակությունը պայմանավորվել են հենց փետրվարյան կայծի մասին:
Լւսանկարը՝ Irakan.info-ի
