Ղարաբաղյան հարցի կարգավորման գործընթացին անդրադառնալով ՀՀԿ-ական պատգամավոր Արտակ Դավթյանը ընդգծեց, որ հիմնախնդրի կարգավորման մասին խոսելիս, անպայման նշվում է, թե հայկական կողմը պետք է տարածքներ զիջի. «ՀՀ իշխանություններն արդեն իրենց հասանելիք փոխզիջումները կատարել են: Մեր առաջին փոխզիջումն այն է, որ առայժմ Ղարաբաղը բանակցային կողմ չէ, սակայն կգա մի ժամանակ, երբ ԼՂՀ-ն ինքը պիտի բանակցի, քանզի այլ կերպ լինել չի կարող: Երկրորդ փոխզիջումն այն է, որ հարգելով մեր արտասահմանյան գործընկերների բանակցային գործընթացը չտապալելու հորդորները, ինչ-որ տեղ նաեւ պարտադրանքները՝ մինչ օրս չենք ճանաչել Լեռնային Ղարաբաղի Հանրապետությունը»:
Դավթյանի խոսքերով, արտաքին քաղաքականության բնագավառում ՀՀ առաջիկա կարեւորագույն քայլը, պետք է լինի ԼՂ-ն բանակցային սեղանի շուրջ վերադարձնելը. «Իսկ ներքաղաքական խնդիրների առումով, առաջնահերթությունը պետք է տալ տնտեսական խնդիրներին` հետճգնաժամային իրավիճակի հաղթահարումը»:
Հանրապետություն կուսակցության անդամ, ՆԳ նախկին նախարար Սուրեն Աբրահամյանն էլ հիշեցրեց, որ ժամանակին Ղարաբաղը բանակցային կողմ էր. «Ժամանակին, երբ ԼՂ-ն բանակցային կողմ էր, Ռոբերտ Քոչարյանը տղայական` ավելի ճիշտ դաշտային հրամանատարի կեցվածքով նստեց բանակցային սեղանին շուրջ, ուր էին նրա շրջապատր անդամները, ինչո՞ւ ոչ ոք չէր ասում, որ վերջին հաշվով Ղարաբաղը պիտի իր ճակատագիրը որոշի»:
