Նորքի ինֆեկցիոն հիվանդանոցից փախուստի դիմած՝ արդարադատության նախարարության «Նուբարաշեն» ՔԿՀ-ի կալանավոր, նախկինում դատապարտված 59-ամյա Սուրեն Գաբրիելյանը երեկ Վրաստանում ենթարկվել է սրտի շտապ վիրահատության, ստենդավորում է իրականացվել, և այս պահին նա դեռ հիվանդանոցում է:
Հիշեցնենք, որ Գաբրիելյանը փախուստի էր դիմել ինֆեկցիոն հիվանդանոցից և հատել հայ-վրացական սահմանը: Հայաստանի սահմանը հաջողությամբ հատել էր, բայց Վրաստանում ձերբակալվել էր, ինչից հետո նրա առողջական վիճակը կտրուկ վատացել է, և շատ արագ վիրահատության են ենթարկել:
Նշենք նաև, որ Գաբրիելյանը Նորքի ինֆեկցիոն հիվանդանոցում էր գտնվում այս տարվա մայիս ամսից՝ հակառակ այն բանի, որ երեք անգամ դատաբժշկական փորձաքննության է ենթարկվել և երեք անգամ էլ ԱՆ-ն եզրակացություն էր տվել, որ նրա խափանման միջոցը պետք է փոխվի, քանի որ նրա առողջական խնդիրներն անհամատեղելի են կալանքի ռեժիմի հետ, նրա առողջական վիճակը չի ներում, որպեսզի մնա կալանքի տակ: Գաբրիելյանը տառապում է լյարդի ցերոզով, շաքարախտով, ինչպես նաև ունի սրտի հետ կապված պրոբլեմներ: Նրա հիվանդություններն ընդգրկված են ՀՀ կառավարության կողմից հաստատված` «Պատիժը կրելուն խոչընդոտող ծանր հիվանդությունների» ցանկում: Սակայն այդպես էլ խափանման միջոցը փոփոխության չէր ենթարկվել:
Գաբրիելյանի պաշտպանը մի քանի անգամ դիմել է գլխավոր դատախազին, բայց դիմումները մակագրվել են մեկ այլ վարչության, որտեղից էլ մերժել են փոփոխել խափանման միջոցը: Փաստաբանը նաև դիմել է դատարան՝ պահանջելով պարտավորեցնել գլխավոր դատախազին փոխել Գաբրիելյանի խափանման միջոցը և թույլատրել նրան գնալ բուժման, սակայն կրկին հաջողության չի հասել:
«Սուրեն Գաբրիելյանը փախուստի է դիմել բացառապես առողջության հետ կապված հարցերից ելնելով: Եթե գլխավոր դատախազությունը պատշաճ օրենքը կիրառեր, ապա Գաբրիելյանը փախուստի չէր դիմի: Ես նաև ՀՔԾ դիմում եմ ներկայացրել՝ պահանջելով, որպեսզի քրեական պատասխանատվության ենթարկեն վարչության պետին և դատախազ Հակոբյանին, քանի որ նրանց անգործության և պաշտոնական դիրքի չարաշահման արդյունքում է, որ Գաբրիելյանը դիմել փախուստի»,- «Առաջին լրատվական»-ի հետ զրույցում ասաց պաշտպանը՝ Հակոբ Ճարոյանը: Նա այսօր կրկին դիմել է դատախազին, նկարագրել Գաբրիելյանի առողջական վիճակը և խնդրել փոխել նրա խափանման միջոցը և հանել հետախուզումը, որպեսզի նա գնա բուժվի և ներկայանա քննության: Պաշտպանը նաև նշել է, որ ինքը պատրաստ է երաշխավորել, որ Գաբրիելյանը կներկայանա քննության:
Դրան զուգահեռ, արդեն իսկ քննարկվում է Գաբրիելյանի արտահանձնման հարցը:
