Այսօր շաքարավազի 1 պարկը 600 դրամով թանկացել է, ինչը նշանակում է, որ 1 կգ շաքարավազը թանկացել է 12 դրամով` չհաշված խանութի հավելագումարը, իսկ դա էլ նշանակում է, որ սպառողի համար շաքարավազն ավելի շատ է թանկացել։
Հարկ է նկատել, որ շաքարավազը Հայաստան է ներմուծում ԱԺ պատգամավոր, հայտնի գործարար Սամվել Ալեքսանյանը։ Շաբաթներ առաջ մենք տեղեկացրել էինք, որ նա նպատակ է դրել շաքարավազի 1 կգ-ի գինը հասցնել 850 դրամի։ Այսօր արդեն խանութներ կան, որտեղ շաքարավազի 1 կգ-ը վաճառվում է 400-450 դրամով։ «Սիթիի» ցանցում, սակայն, այն վաճառվում է 345 դրամով։ Պատճառն այն է, որ որպես գերիշխող դիրք ունեցող սուպերմարկետների ցանց` Տնտեսական մրցակցության պաշտպանության պետական հանձնաժողովը այստեղ է ուսումնասիրություններ անցկացնում, հետևաբար Սամվել Ալեքսանյանը «Սիթիի» ցանցում շաքարավազը չի թանկացնում, որ խախտումներ չարձանագրվեն։
Տնտեսական մրցակցության պաշտպանության հանձնաժողովի մամուլի քարտուղար Նելլի Դանիելյանի հետ այսօր մենք չկարողացանք կապվել, փոխարենը` զրուցեցինք հանձնաժողովի նախագահի օգնական Արտակ Շաբոյանի հետ, ով նշեց, որ կարող է տեղեկություն հաղորդել միայն հանձնաժողովի նախագահի հատուկ հանձնարարականի դեպքում։ Այսինքն` մեր ունեցած ինֆորմացիան, ո՛չ հերքեց, ո՛չ հաստատեց` առաջարկելով սպասել, մինչև հաջողվի կապվել Տնտեսական մրցակցության պաշտպանության պետական հանձնաժողովի քարտուղարության հետ։