ՀՀԿ ԳՄ նիստից առաջ Հովիկ Աբրահամյանը լրագրողների հետ ճեպազրույցում հիշեցրել է, որ երկու ամիս առաջ քաղաքական այն ուժերը, որ այսօր սատարում և աջակցում են «Շրջանառության հարկի մասին» օրենքի դեմ բողոքող առևտրականներին, լուռ էին նույն այդ օրենքը ընդունելիս և ոչ մի ձայն, ոչ մի դժգոհություն չէին արտահայտում: Աբրահամյանը ասում է, որ եթե օրենքը չի բխում ժողովրդի շահերից, ապա թող գան, նստեն ու քննարկեն, սակայն ըմբոստանալ ու սրել իրավիճակը ընդունելի չէ:
Հովիկ Աբրահամյանի այս արտահայտությունը և վերջին օրերի մի շարք արտահայտություններ, ըստ էության, այնպիսի տպավորություն են թողնում, որ ուժերը, որոնք երկու ամիս առաջ աջակցել են նրան այս օրենքն ընդունել, այսօր պարզապես «գցել» են նրան, կամ նա առնվազն ունի «գցված լինելու» կասկածներ կամ զգացողություն և այս իսկ պատճառով փորձ է անում ապահովագրվել ավելի հեռուն «գցվելուց»:
Խոսքը, բնականաբար, ոչ իշխանական ուժերի մասին է, որոնք իսկապես երկու-երեք ամիս առաջ Հովիկ Աբրահամյանի հետ հույսեր էին կապում և հավանության արժանացնում նրա քայլերը: Ըստ էության, այսօր այդ ուժերի պահվածքից թվում է, որ նրանք ընդամենը Աբրահամյանին ավելի խորն են մղել անտառ՝ ավելի հիմնավոր մոլորեցնելու համար: Սակայն կա տարբերակ նաև, որ միգուցե այդ ուժերի պահվածքի պատճառն այն է, որ նրանք էլ համարում են, որ Աբրահամյանն է ինչ-որ պահի «գցել» իրենց՝ օգտագործելուց հետո, և այսօր, ըստ էության, իրենք են այսպես ասած պատասխան տվողի, այսինքն` վերադարձնողի դերում և արժանին են հատուցում Աբրահամյանին:
Եվ վերջապես, բացառված չէ նաև կազմակերպված թատրոնի տարբերակը, երբ այսպես ասած «պասերով» խաղ է ընթանում հոկտեմբերի 10-ի հանրահավաքից առաջ` ըստ էության հասարակական լուրջ հուզումներ գեներացնելու և այսպիսով հանրահավաքի ընթացքում գոնե մի այնպիսի մասսա ապահովելու, որն ինքը կգա հանրահավաքի, որպեսզի չստացվի, որ բոլորին բերել են Ծառուկյանի ավտոբուսներով:
Վերջիվերջո, դատելով ԲՀԿ-ականների հայտարարություններից, հոկտեմբերի 10-ի գլխավոր խնդիրը հանրահավաքի բազմամարդությունն ապահովելն է, իսկ դրա համար պետք է հասարակության մեջ գեներացնել սոցիալական բողոքի դրսևորումներ:
Լուսանկարը՝ armtimes.com-ի
