Ադրբեջանական գերության մեջ մահացած Հայաստանի քաղաքացի Մանվել Սարիբեկյանի մարմինն այսօր հայ- ադրբեջանական շփման գոտու հյուսիսարեւելյան սահմանում` Իջեւան – Ղազախ ճանապարհի հատվածում, հանձնվեց հայկական կողմին: Հայաստանն իր հերթին Ադրբեջանին հանձնեց այս տարի Հայաստանի սահմանը ապօրինի հատած մի ադրբեջանցու, հաղորդում է «Ազատություն» ռ/կ-ի թղթակիցը Տավուշի մարզից:
Ադրբեջանի պաշտպանության նախարարությունը պնդում է, թե Մանվել Սարիբեկյանը հայ հետախույզ էր, գերեվարվել էր սեպտեմբերի 11-ին` «Լեռնային Ղարաբաղի հյուսիսարեւելյան հատվածից հայկական ուժերի իրականացրած դիվերսիոն գործողության ընթացքում»: Հոկտեմբերի 5-ին Ադրբեջանի պաշտպանության նախարարությունն ու զինդատախազությունը համատեղ հաղորդագրություն տարածեցին, թե Սարիբեկյանը նախնական կալանքի վայրում ինքնասպանություն է գործել: Հայկական կողմից, սակայն, հայտարարել են, որ Սարիբեկյանը զինծառայությունն ավարտել է անցած տարվա մայիսին եւ որեւէ կապ չունի Հայաստանի ու Լեռնային Ղարաբաղի զինված ուժերի ու հատուկ ծառայությունների հետ: Հայկական կողմը նաեւ կասկածի տակ է առնում Սարիբեկյանի ինքնասպանության վարկածը:
