Մասիսի ընդհանուր իրավասության դատարանում այսօր շարունակվեց 2009 թ. հոկտեմբերին Երասխ-Երևան ավտոճանապարհին, Մարմարաշեն գյուղի հատվածում քաղաքացի Արթուր Զադոյանի վրա ԲՀԿ-ական պատգամավոր Կարո Կարապետյանի արձակած կրակոցների կասեցված գործի քննությունը:
Հիշեցնենք, որ 2009-ին Երասխ-Երևան ավտոճանապարհին ԱԺ պատգամավոր Կարո Կարապետյանն իր ավտոմեքենայում վեճի էր բռնվել Դվին գյուղի բնակիչ, Արարատի մարզպետարանի աուդիտոր Արթուր Զադոյանի հետ, որի ընթացքում Արթուր Զադոյանը երկաթյա ձողով (ավտոմեքենայի համարանիշ ամրացնելու բանալիով) հարվածել էր Կարո Կարապետյանի գլխին, որն էլ իրեն ամրակցված «Բրաունինգ» տեսակի ատրճանակով 5 անգամ կրակել էր Արթուր Զադոյանի ուղղությամբ: Փամփուշտներից երկուսը դիպել էին Զադոյանի աջ ուսին և աջ ոտքին: Այնուհետև Կարապետյանը նաև ծեծի էր ենթարկել նրան. Զադոյանը ոտքերի հարված էր ստացել գլխին, ինչը դարձել էր ուղեղի ցնցման պատճառ, վնասվել էին նաև նրա կողերը: Զադոյանը, բարեբախտաբար, ողջ էր մնացել, նա տեղափոխվել էր «Էրեբունի» բժշկական կենտրոնի վերակենդանացման բաժին և 3 վիրահատության ենթարկվել: Քրեական գործ էր հարուցվել, սական ավելի ուշ կասեցվել էր իբր մեղադրյալի՝ Արթուր Զադոյանի առողջական խնդիրների պատճառով: Սակայն գործի քննությունը մի քանի ամիս առաջ վերաբացվել է և ուղարկվել դատարան:
Դատարանում այսօր Կարո Կարապետյանը բավական մարտական էր տրամադրված: Նա մինչ նիստի սկսելը հայտարարեց, թե լավ է արել, որ կրակել է, հո չէր թողնի, որ իրեն սպանեին: «Եթե ես ուզենայի, գլխից կխփեի, բայց չեմ խփել, թողել եմ, որ «զակազչիկին» պարզեմ ով ա: Ես իրան հատուկ խփել եմ նրա համար, որ ինքը ինձի չխփի, որ քննություն լինի, որ արդարությունը պարզվի»,- հայտարարեց Կարո Կարապետյանը: Բացի այդ, նա նաև ասաց, որ ինքն է նամակով դիմել Սերժ Սարգսյանին գործը վերաբացելու խնդրանքով:
Մեր հարցին, թե ինչպես է պատահել, որ համ ինքը կրակել է, համ հայտնվեկ տուժողի կարգավիճակում, պատգամավորը բացատրեց. «Բա ինքն ա ինձ խփել: Ավտոմեքենայի մեջ 3 անգամ լոմով հարվածել ա գլխիս, արյունը գլխիցս չռում էր, 2.5 լիտր արյուն եմ կորցրել: Հետո ուզում էր զենքը հաներ, ինձ խփեր, վարորդս երկու անգամ օդ կրակեց: Երրորդ անգամ ասացի՝ դե, բոլ եղավ, պիտի սատկացնեմ: Կզվա, զենքը հանեցի ու կրակեցի: Բայց եթե ուզենայի սպանեի, գլխին կկրակեի, ոտքին չէի կրակի: Լավ կրակել էլ գիտեմ, պատերազմի էլ եմ մասնակցել, ամեն ինչ էլ գիտեմ: Բա դրանից հետո տուժող չճանաչվեի՞»,- զարմացավ նա:
Դատական նիստում, սակայն, առանձնապես քննություն չգնաց, մեղադրող կողմի փաստաբանը երկու միջնորդություն ներկայացրեց, որոնք խորհրդակցական սենյակում քննելուց հետո աշխատանքային օրն ավարտվեց:
Մանրամասները՝ տեսանյութում։