Ադրբեջանական anspress.com կայքի փոխանցմամբ, ամերիկյան սոցիոլոգներն ամփոփել են 2010 թվականին աշխարհի մոտ 100 երկրներում անցկացրած հարցախույզի արդյունքները` պարզելով, թե այդ երկրներն ինչպիսի դիրքորոշում ունեն համաշխարհային քաղաքականության առաջատարների հանդեպ:
Հայաստանում անցկացված հետազոտությունները ցույց են տվել, որ հարցախույզի մասնակիցների 75 տոկոսը աջակցում է Ռուսաստանի քաղաքականությանը` այն որակելով որպես արդյունավետ: Դրա հետ համամիտ չէ ընդամենը 7 տոկոսը:
Իր ռուսամետ դիրքորոշմամբ, Հայաստանն այդ 100 երկրների թվում գրավել է 5-րդ տեղը` զիջելով միայն Տաջիկստանին, Ուզբեկստանին, Ղրղզստանին և Մալիին:
Ադրբեջանում անցկացված հարցախույզի արդյունքներից պարզվել է, որ Ռուսաստանի քաղաքականությունը դրական է գնահատում բնակչության մոտ 54 տոկոսը:
Վրաստանում Ռուսաստանի քաղաքականությունը խիստ բացասական է գնահատում հարցախույզի մասնակիցների 76 տոկոսը: Միայն 6 տոկոսն է Մեդվեդևի ու Պուտինի քայլերն արդյունավետ գնահատում:
Ռուսաստանից հետո Հայաստանի բնակչության աջակցություն վայելող երկրորդ երկիրը Ֆրանսիան է: Նրա օգտին է արտահայտվել հարցախույզի մասնակիցների 62 տոկոսը: 12 տոկոսը համաձայն չէ դրա հետ:
Վրաստանում Ֆրանսիայի քաղաքականությանը դրական է նայում 34 տոկոսը, Ադրբեջանում` 42 տոկոսը, իսկ Թուրքիայում` ընդամենը 22 տոկոսը:
Վերջինս պայմանավորված է նրանով, որ Ֆրանսիայի նախագահ Նիկոլա Սարկոզին հանդիսանում է ԵՄ-ին Թուրքիայի լիիրավ անդամակցության կատաղի հակառակորդը` փոխարենն առաջարկելով «արտոնյալ գործընկերություն»:
Ինչ վերաբերում է ԱՄՆ-ին, ապա Ադրբեջանում նրա քաղաքականության օգտին է արտահայտվել հարցախույզի մասնակիցների 58 տոկոսը, իսկ Վրաստանում` մոտ 47 տոկոսը:
