«Առաջին լրատվական»-ի տեղեկություններով՝ վաղը պաշտոնական այցով Երևան է ժամանելու ՌԴ արտաքին գործերի նախարար Սերգեյ Լավրովը: Մեր աղբյուրների համաձայն՝ քանի որ կառավարությունն այսօրվա նիստում հավանություն է տվել «Հայաստանի Հանրապետության՝ Եվրասիական տնտեսական միության մասին 2014 թվականի մայիսի 29-ի պայմանագրին միանալու մասին» պայմանագրի նախագծին, Սերգեյ Լավրովը վերջին հստակեցումները պետք է իրականացնի ու հանդիպումներ ունենա պաշտոնական Երևանի ներկայացուցիչների հետ՝ Հայաստանի եվրասիական ինտեգրացիայի վերջին փուլն ավարտին հասցնելու նպատակով:
«Առաջին լրատվական»-ը փորձեց տեղեկությունը պարզել նաև ՌԴ ԱԳ նախարարության մամուլի ծառայությունից: ՌԴ ԱԳՆ մամուլի ծառայության պետական այցերի բաժնից մեզ տեղեկացրին, որ չեն կարող հստակորեն հերքել կամ հաստատել այդ լուրը: Թեև նշեցին, որ իրենց ձեռքի տակ եղած այցերի ծրագրի համաձայն՝ հոկտեմբերի 3-ին չի նախատեսվում ՌԴ ԱԳ նախարար Սերգեյ Լավրովի պաշտոնական այց Երևան:
ՀՀ ԱԳ նախարարությունից լուրի իսկությունը պարզել չհաջողվեց: Կարելի է ենթադրել, որ այցը կազմակերպվել է հենց այսօր, երբ հայտնի է դարձել, որ կառավարությունն այսօրվա նիստում հավանություն է տվել «Հայաստանի Հանրապետության՝ Եվրասիական տնտեսական միության մասին 2014 թվականի մայիսի 29-ի պայմանագրին միանալու մասին» պայմանագրի նախագծին:
Հիշեցնենք, որ այսօր «Ռուսաստանն է կանչում» միջազգային ֆորումի ընթացքում Հայաստանի ԵՏՄ անդամակցությանն էր անդրադարձել ՌԴ նախագահ Վլադիմիր Պուտինը: Նա նշել էր, որ ավարտին է մոտենում Հայաստանի՝ ԵՏՄ անդամակցության գործընթացը:
