«Առաջին լրատվական»-ի տեղեկություններով՝ Air Armenia ավիաընկերությունը լուրջ խնդիրներ ունի և առաջիկայում հավանաբար սնանկ կհայտարարվի: Ավիաընկերությունը խոշոր պարտքեր ունի «Զվարթնոց» օդանավակայանին: Բացի այդ՝ դեռ չի վճարել նաև Դուբայից ձեռք բերած 2 օդանավի ամբողջական գումարը և դեռ 5 միլիոն դոլարի չափ պարտք ունի:
Մեզ հասած տեղեկություններով՝ ավիաընկերությունն արդեն իսկ կանչել է իր աշխատողներին և խնդրել ազատման դիմումներ գրել, քանի որ այլևս չի կարող վճարել նրանց աշխատավարձը:
Մենք փորձեցինք «Զվարթնոց» օդանավակայանից ճշտել, թե ինչ չափերի է հասնում Air Armenia-ի պարտքը, սակայն այնտեղից հրաժարվեցին հստակ տեղեկություն տալ:
«Բոլոր ավիաընկերություններն էլ պարբերաբար գումարային պարտավորություններ ունենում են, բայց ես չեմ կարող ասել՝ այս պահին Air Armenian-ն պարտք ունի՞, թե՞ ոչ, և եթե ունի, ապա որքան է: Լավ կլինի իրենցից ճշտեք գումարային հարցերը»,- ասաց «Զվարթնոց» օդանավակայանի հասարակայնության հետ կապերի պատասխանատու Գևորգ Աբրահամյանը:
Փաստորեն՝ Հայաստանին այդպես էլ չի հաջողվում ազգային ավիափոխադրող ունենալ, և սա արդեն երկրորդ ավիաընկերությունն է, որ կանգնում է սնանկության առաջ:
Հիշեցնենք, որ «Արմավիա» ավիաընկերությունն էլ անցած տարի սնանկ ճանաչվեց, և այժմ սնանկության գործը գտնվում է դատարանում, իսկ ընկերության ունեցած պարտքերը մինչ օրս մարված չեն:
