Թուրքիայի տարածքում տեղակայվելիք ՆԱՏՕ-ի հրթիռները միայն կվտանգեն Թուրքիայի անվտանգությունը: Այս մասին հայտարարել է Իրանի պաշտպանության նախարար Ահմեդ Վահիդին, հայտնում է Reuters-ը:
«Patriot հրթիռների տեղակայումը Թուրքիայում ոչ մի դեր չի խաղում Թուրքիայի անվտանգության ապահովման գործում ու վնասում է Թուրքիային որպես պետություն: Արևմուտքը միշտ հետապնդել է իր շահերը, ու մենք համաձայն չենք արևմտյան երկրների ներկայությանը տարածաշրջանային փոխհարաբերություններում»,- ասել է նա:
ԱՄՆ պաշտպանության նախարար Լեոն Պանետան 2012թ. դեկտեմբերի 14-ին հրաման է ստորագրել Թուրքիա Patriot 2 հրթիռային մարտկոց ուղարկելու մասին: Համաձայն հրամանի՝ ՀՀՊ համակարգը սպասարկելու համար այնտեղ կուղղվեն 400 ամերիկացի զինծառայողներ:
Հրթիռները Թուրքիա կուղարկվեն մի քանի շաբաթվա ընթացքում: Բացի ԱՄՆ-ից՝ Թուրքիային Patriot հրթիռների մատակարարման մասին են հայտարարել նաև Գերմանիան ու Նիդեռլանդները՝ Եվրոպայի միակ պետությունները, որոնք ունեն նման հրթիռներ:
Patriot ՀՀՊ համակարգի տեղակայումը հիմնավորվում է Սիրիայից Թուրքիան պաշտպանելու անհրաժեշտությամբ:
Հիշեցնենք, որ 2012թ. նոյեմբերին Թուրքիան ՆԱՏՕ պաշտոնական հարցում էր ուղարկել Սիրիայի հետ սահմանի 900 կմ-անոց հատվածում Patriot տեսակի հրթիռների տեղակայման վերաբերյալ: Դեկտեմբերի 4-ին ՆԱՏՕ-ն հավանություն էր տվել հարցմանը:
