Սփյուռքահայ ներդրող, գործարար էդմոն Խուդյանի գործով դատական գործընթացն արդեն իսկ մեկնարկել է, և այս պահին կողմերի միջև բանակցություններ են ընթանում, որից հետո կսկսվի բուն դատավարությունը:
Հիշեցնենք, որ Խուդյանը, հույսը կտրելով Հայաստանում արդարադատության հասնելուց, դիմել էր Վաշինգտոնի ներդրումային վեճերի կարգավորման միջազգային դատարան (International Court for Settlement of Investment Disputes): Այս միջազգային դատարան հնարավոր է դիմել 1994-1996 թվականներին Ամերիկայի Միացյալ Նահանգների և Հայաստանի կառավարությունների միջև ստորագրված համապատասխան փաստաթղթի շրջանակներում: Այն ամերիկացի ներդրողներին հնարավորություն է տալիս իրենց ներդրումային վեճերը լուծել այդ ընթացակարգով:
Խուդյանի ներկայացուցիչ, փաստաբան Լեռնիկ Հովհաննիսյանն «Առաջին լրատվական»-ի հետ զրույցում ասաց, որ այս դատավարությունը ընթանում է արբիտրաժային կարգով, ինչը իրենից որոշակի գաղտնիություն է ենթադրում: Հետևաբար, այս պահին որևէ բան ասել չենք կարող: «Միայն կարող եմ ասել, որ այս պահին կողմերը բանակցում են, ինչը կտևի 1.5-2 ամիս, որից հետո կսկսվի բուն դատավարությունը: Բայց այս պահին ավելի բան ասելը նպատակահարմար չենք գտնում»,- ասաց Հովհաննիսյանը:
Նշենք, որ նույն ընթացակարգով տարիներ առաջ արդարադատության հասավ նաև «Գլոբալ Գոլդ Մայնինգ» ՍՊԸ տնօրեն Վան Գրիգորյանը, որը դատական վեճի մեջ էր ԱԺ պատգամավոր Վարդան Այվազյանի հետ: Վան Գրիգորյանը նույն միջազգային դատարանի միջոցով Հայաստանից հետ ստացավ հսկայական փոխհատուցում, որի չափը, կողմերի համաձայնությամբ և դատավճռի համաձայն, այդպես էլ չհրապարակվեց: Չնայած ավելի ուշ մամուլում հրապարակված փաստաթղթերի համաձայն՝ փոխհատուցումը կազմում էր 37.5 մլն դոլար, որը վճարվեց Վան Գրիգորյանին հայաստանյան հարկատուների գրպանից:
«Ցավով եմ հայտնում, որ մի քանի օր առաջ սկսվեց Հայաստանի Հանրապետության դեմ իմ դատական գործընթացը: Հայաստանյան արդարադատության մի քանի բարձրաստիճան պաշտոնյաներ գործել են կողմնակալ ձևով, հովանավորել ենա հանցագործներին և խախտել օրենքներ: Ցավոք, դրա համար պատասխանատվության կենթարկվի Հայաստանի կառավարությունը կամ ավելի կոնկրետ՝ քաղաքացին: Այս դատը իմ բողոքն է Հայաստանի արդարադատությանը և ոչ Հայրենիքին կամ որևէ հայի,- ֆեյսբուքյան իր էջում գրել է Էդմոն Խուդյանը՝ հավելելով,- ցանկանում եմ նշել, որ Հայաստանում գործում են բազմաթիվ հաջողակ սփյուռքահայ գործարարներ, և իմ գործնական անհաջողությունը չի նշանակում, որ Հայաստանում հաջողության հասնել հնարավոր չէ: Սակայն Հայաստան-Սփյուռք համաժողովները ավելի արդյունավետ կլինեն, և Սփյուռքի լիարժեք ներուժը կգործի միայն իրական Արդարադատության Համակարգ ունենալու դեպքում»:
