Քաղաքագետ Հմայակ Հովհաննիսյանը կարծիք է հայտնում, որ ոչիշխանական քառյակի՝ հոկտեմբերի 10-ին նշանակված հանրահավաքի օրը պատահական չէ ընտրված և, ըստ էության, զուգահեռված է Եվրասիական տնտեսական միության գագաթնաժողովի օրվան, որում Հայաստանի անդամակցության հարցը կարող է լուծվել: Ըստ քաղաքագետի, հանրահավաքը Սերժ Սարգսյանին թույլ կտա Մինսկում՝ որտեղ գագաթնաժողովն է լինելու, հանդես գալ ամուր դիրքերից և հստակ դնել Հայաստանի անդամակցության հարցը:
Այն, որ հանրահավաքի օրը պատահական չէր կարող լինել՝ պարզ էր ի սկզբանե, սակայն, մեղմ ասած, դժվար է կարծել, որ հանրահավաքի օրն ընտրված է Սերժ Սարգսյանի գործը հեշտացնելու համար: Խնդիրը այն է, որ Սերժ Սարգսյանի գործը կարող էր հեշտանալ, եթե ոչիշխանական ուժերը հանդես գային Եվրասիական միության անդամակցությունը դատապարտելու և հրաժարում պահանջելու դիրքորոշումով: Սակայն ոչիշխանական ուժերը, ինչպես հայտնի է, որոշակի ժառանգական բացառություններով, սակայն ոչ սկզբունքային դիրքորոշմամբ, հանդես են եկել և հանդես են գալիս Եվրասիական միության «անշրջելիության» մասին «թեզով»: Այսինքն՝ նրանք Եվրասիական միությանը Հայաստանի անդամակցելու կողմնակիցներ են: Իսկ սա նշանակում է, որ նրանց հանրահավաքը Սերժ Սարգսյանի դիրքերը չի ամրացնելու, այլ գուցե և հակառակը՝ Սերժ Սարգսյանին Մինսկում կարող են առաջադրել պայմաններ, որոնք չընդունելու դեպքում նրանք կսպառնան երևանյան հանրահավաքով, որտեղ, այսպես ասած, հերթի են սպասում այն ուժերը, որոնք պայքարում են Հայաստանում իշխանության գալու Ռուսաստանի թույլտվության համար:
Սերժ Սարգսյանի դիրքերն ուժեղացնող կլիներ Եվրասիական միությանն անդամակցումը դատապարտող հանրահավաքը, որի պարագայում Սարգսյանը Մինսկում կներկայանար որպես Հայաստանի, այսպես ասած, միակ եվրազիստ: Իսկ այս դեպքում հոկտեմբերի 10-ի երևանյան հանրահավաքով, ըստ էության, ուժեղանում են նրանք, ովքեր Մինսկում նույն օրը ցանկություն կամ պլաններ ունեն Սերժ Սարգսյանի առաջ նոր պայմաններ դնելու: Եվ հանրահավաքի օրը գուցե թե պատահական չէ ընտրված հենց այս նկատառումից ելնելով կամ հենց այս պատճառով:
Ի վերջո, հանրահավաքին ընդառաջ հայտարարվել է, որ Եվրասիական միությանը Հայաստանի անդամակցությունը ներկայումս ամենակարևոր հարցը չէ: Այսինքն՝ ըստ էության, հստակ մեսիջ է հղվել Մինսկում հավաքվող երեք երկրների՝ Ռուսաստանի, Բելառուսի և Ղազախստանի նախագահներին, թե կարող եք գործել՝ ինչպես ուզում եք. Հայաստանի այսպես ասած՝ ընդդիմությունը կամ ոչիշխանությունը ձեզ չի խանգարի: Ըստ որում, մեծ հաշվով հենց սա է եղել Հայաստանի ներքաղաքական կյանքը վերջին մեկ տարվա ընթացքում, այսինքն՝ այդ կյանքը կառուցվել է հենց այս տրամաբանությամբ՝ սեպտեմբերի 3-ից հոկտեմբերի 10: