Շաբաթ օրը Գագիկ Ծառուկյանին պատկանող «Փարավոն» զվարճանքների վայրում կայացավ ԲՀԿ-ական պատգամավոր Ռուբեն Գևորգյանի հիմնած՝ «Երդվյալ ազատամարտիկների միության» անդրանիկ համագումարը, որին հազարից ավելի մարդ էր ներկա: Հյուրերի ցանկում Արցախի հերոս, գեներալ-մայոր Արկադի Տեր-Թադևոսյանն էր: Նրա հետ մեր զրույցը ներկայացնում ենք ստորև:
– Պարոն գեներալ, ինչո՞վ է բացատրվում Ձեր ներկայությունը նորաստեղծ միության համագումարին: Ձեզ հրավիրե՞լ էին, ի՞նչ կարգավիճակով էիք Դուք մասնակցում այդ համագումարին:
– Ես որպես ազատամարտիկ գնացել ողջունել եմ նրանց: Իմ կարգավիճակը դա էր: Ազատամարտիկ, ով իրենց հետ մարտի դաշտում է եղել: Գնացի, հետները խոսեցի նրանց վիճակի մասին, խնդիրների մասին և հասկացա, որ այդ միությունը պետք էր մեզ: Այդ մարդիկ ուրիշ գաղափար ունեն: Այդ մարդիկ այս միություն մտել են, քանի որ ուրիշ տեղ իրենց չեն ընդունում: Ես տենց բան ընդհանրապես չէի տեսել: Ինձ հրավիրեցին, ես էլ գնացի պարզապես խոսք ասելու, որ մեր երկրի համար դժվար պահին պետք է բոլորը մոռանան իրենց նպատակների մասին և համախմբվեն երկրի շուրջը, որ մեր թշնամին մեզանից վախենա այնպես, ինչպես հիմա:
– Իսկ այսօր կա՞ նման միություններ ստեղծելու անհրաժեշտություն:
– Ի՞նչ վատ բան կա այդտեղ: Այնտեղ հավաքվել էին մարդիկ, որ մտել ու դուրս են եկել ինչ-որ կազմակերպություններ, բայց հիմա հավաքվել են մի տեղ, որտեղ կիսում են իրենց գաղափարները: Թող հավաքվեն իրենց նպատակների շուրջ, իրենց խնդիրները լուծեն, բայց անհրաժեշտ պահին, եթե երկրին պետք գան, համախմբվեն և պաշտպանեն մեր երկիրը: Ի՞նչ վատ բան կա այդտեղ: Ուղղակի մեր հայերի սովորությունն է, որ մի նոր բան ստեղծվում է, ուրեմն ինչ-որ մեկի դեմ է ստեղծվել:
– Իսկ Դուք նման միտում չե՞ք տեսնում, որ այս միությունը ինչ-որ մեկի համար և ինչ-որ մեկի դեմ է ստեղծվել:
– Չէ, ես չեմ տեսնում: Եթե նկատի ունեք երկրապահներին, ապա սա երկրապահներին հակակշիռ չէ: Երկրապահը իր տեղն ունի, իր դերն ունի, սա՝ իր տեղը: Ի՞նչ կա որ: Մենք ազատամարտիկների 20 հատ նման միություններ ունենք, թող սա էլ 21-րդը լինի:
– Իսկ մտահոգիչ չէ՞ այն փաստը, որ միությունը ստեղծողը ԲՀԿ-ական պատգամավոր է, իսկ հովանավորողը՝ ԲՀԿ առաջնորդը: Այդ փաստը չի՞ վկայում, որ այս միությունը քաղաքական նպատակներ է հետապնդում:
– Գիտեք ինչ, երբ ԵԿՄ-ն ստեղծվում էր, իրենք ասում էին, որ քաղաքականությամբ չեն զբաղվելու: …Գիտեք ինչ, քաղաքականությունը կյանքի, առօրյայի մի մասն է, և ամեն մի կուսակցություն պետք է իր նպատակին հասնի, այն է՝ գալ իշխանության: Դա յուրաքանչյուր կուսակցության հիմնական նպատակն է, և ես այդտեղ ոչ մի վատ բան չեմ տեսնում: Հասարակության մեջ պետք է պայքար լինի իշխանության համար: Դա նորմալ է:
– Իսկ որքանո՞վ է արդարացի իշխանության գալու այդ պայքարում «օգտագործել » ազատամարտիկներին, այս ու այն կողմ քաշել նրանց: Ձեր կարծիքով՝ դա չի՞ մասնատում, ճամբարների չի՞ բաժանում ազատամարտիկներին:
– Դե, մեր ժողովուրդն էլ է այդպես. մի մասը մի կողմում է, մյուսը՝ մեկ այլ: Բայց սա սովորական մարդկային կյանք է: Ես չեմ հասկանում, թե այս հարցում մտահոգությունը որն է: Մի թև, մեկ այլ թև… դե, թող սաղ վերցնեն՝ երկրապահ մտնեն: Ի՞նչ է, մոնոպոլիա՞ է, այս ոլո՞րտն էլ պետք է մոնոպոլիզացնել: Հիմա հակառակը՝ բազմակարծություն պետք է լինի, ամեն մեկը իր գաղափարները առաջ տանի: Դա է նորմալ:
– Ռուբեն Գևորգյանը համագումարի օրը նշեց, որ արդեն իսկ միությանն անդամագրվել են 5 հազարից ավելի առաջին գծում կռված ազատամարտիկներ: Այդ թիվն իրատեսակա՞ն է՝ Ձեր կարծիքով: Մենք այդքան ազատամարտիկ ունե՞նք առաջին գծում կռված:
– Այո, ունենք այդքան ազատամարտիկ: Ես կարող եմ վստահ ասել, որ մենք ավելի շատ ունենք:
