«Առաջին լրատվական»-ի զրուցակիցն է Իտալիայում սփյուռքի նախարարի խորհրդական, Իտալիայում Հայաստանյայց եկեղեցու ատենապետ Սարո Խուդավերդին:
– Պարոն Խուդավերդի, Դուք տեղյա՞կ եք, որ մոտ երկու ամիս առաջ Ադրբեջանի նախագահ Իլհամ Ալիևը Իտալիայում այդ երկրի ղեկավարների հետ համագործակցության համաձայնագիր է ստորագրել, որտեղ ոչ հայանպաստ դրույթներ կային:
– Ամբողջությամբ տեղյակ չեմ, գիտեմ, որ Ալիևն այցելեց Իտալիա: Հայաստանի դեսպան Սարգիս Ղազարյանն ակտիվորեն աշխատում է: Գիտեմ, որ մեր դեսպանի կողմից ամեն ջանք թափվում է՝ մեր ծրագիրն ու նպատակները հաջողելու համար, իսկ թե ապագայում ինչ արդյունքներ կունենանք՝ չեմ կարող ասել: Բայց մենք աշխատում ենք, որ Իտալիայի վարչապետը չգնա Ադրբեջան, և այսօր պաշտոնական լուր ունեցանք, որ նա չի գնալու:
– Հայտնի է, որ Իտալիան նավթագազային ոլորտում Ադրբեջանի հետ տնտեսական սերտ համագործակցություն է սկսել: Արդյոք այդ համագործակցությունն ի վնաս Հայաստանի չի՞ լինի:
– Ոչ, ես չեմ կարծում, որ որևէ ազդեցություն ունենա: Իտալիան միայն տնտեսական նպատակներ ունի:
– Բայց չէ՞ որ տնտեսությունը միշտ ազդեցություն է ունենում քաղաքականության վրա: Եվ շատ հաճախ տնտեսական շահերն են պայմանավորում քաղաքական հարաբերությունները:
– Անկասկած, բայց միևնույն ժամանակ մենք ունենք տարբեր ծանոթություններ Իտալիայի խորհրդարանում, և մեր դեսպան Ս. Ղազարյանը լավ աշխատում է: Բայց Իտալիայում ընդամենը 3000 հայ կա, Ֆրանսիայի նման չէ, որտեղ հարյուր հազարավոր հայեր կան: Եվ մենք անկասկած մեր ջանքերի չափով գործում ենք:
– Դուք անընդհատ հիշատակում եք դեսպան Ս. Ղազարյանի գործունեությունը, սակայն Հայաստանի դիվանագետները չկարողացան այնպես անել, որ Ադրբեջանի հետ կնքած համաձայնագրում չլիներ ոչ հայանպաստ դրույթ, այն է՝ Իտալիան պաշտպանում է Ադրբեջանի տարածքային ամբողջականությունը:
– Գիտեմ, որ մեր դեսպանը շատ անխնա կերպով աշխատում է, տեղյակ ենք, որ ինքը իտալական խորհրդարանի տարբեր անդամների հետ ճանապարհներ է գտնում, որ այդ հարցը լուծի: Եվ գիտենք, որ կհաջողի: