Վրաստանը եւ Իրանը երեկ երեկոյան Թբիլիսիում համաձայնագիր են ստորագրել երկու երկրների միջեւ առանց վիզայի ռեժիմի մասին: Փաստաթուղթն ստորագրել են Իրանի արտաքին գործերի նախարար Մանուչեհր Մոթաքին եւ նրա վրացի պաշտոնակից Գրիգոլ Վաշաձեն: Նախարարները նշել են ստորագրված փաստաթղթի կարեւորությունը, որը կդյուրացնի երկու երկրների քաղաքացիների փոխադարձ այցելությունները: «Սա հույժ կարեւոր փաստաթուղթ է, որը հարեւաններին թույլ է տալիս շփվել առանց սահմանների եւ մոտեցնում է ժողովուրդներին»,- ասել է Մոթաքին: Վաշաձեն ասել է, որ Վրաստանը ձգտում է առանց վիզայի հաղորդակցություն ապահովել բոլոր հարեւանների հետ` հիշեցնելով, որ ավելի վաղ նույնպիսի համաձայնագիր է ստորագրվել Թուրքիայի հետ: Նրա խոսքով` Իրանը, որի հետ Վրաստանը պարզեցնում է այցագրային ռեժիմը, բացառություն չէ. «Վրաստանում իրանցի զբոսաշրջիկների թիվը կրկնապատկվել է, եւ վրացական կողմը շահագրգռված է դրանում, ինչպես եւ այդ երկրի հետ առեւտրաշրջանառության մեծացման հարցում, ինչին էլ ավելի կնպաստի այցագրային ռեժիմի պարզեցումը»,- ասել է Վաշաձեն: Իրանի հետ առանց վիզայի ռեժիմ հաստատելու հարցում շահագրգռություն է հայտնել նաեւ Վրաստանի նախագահ Միխեիլ Սահակաշվիլին: «Վրաստանի կառավարությունը շահագրգռված է հարեւան պետությունների, այդ թվում` Իրանի հետ, առեւտրական ու տնտեսական հարաբերությունների խորացմամբ: Իրանի ԱԳ նախարարի այցի ընթացքում բանակցությունների հիմնական հարցը կլինի երկու երկրների միջեւ առանց վիզայի ռեժիմը»,- նախագահի անունից ասել է նրա մամուլի քարտուղար Մանանա Մանջղալաձեն: Մոթաքիի այցի ընթացքում նախատեսված Է նրա հանդիպումը Վրաստանի նախագահ Միխեիլ Սահակաշվիլիի հետ: Մոթաքին նաեւ կայցելի Բաթում եւ այնտեղ կմասնակցի Վրաստանում Իրանի գլխավոր հյուպատոսարանի բացման արարողությանը:
