Հայաստան–Սփյուռք հինգերորդ համաժողովի շրջանակներում Մեծի Տանն Կիլիկիո կաթողիկոս Ն.Ս.Օ.Տ.Տ. Արամ կաթողիկոսի հայտարարությունը բավականին մեծ արձագանք է ստացել թե Հայաստանում, թե Սփյուռքում և թե Թուրքիայում: Կաթողիկոսը տեղեկացրել էր, թե դիմելու է Թուրքիայի սահմանադրական դատարան՝ կաթողիկոսության՝ Կիլիկիայի պատմական հայկական թագավորության տարածքում գտնվող Սիսի նստավայրը և կալվածքները վերադարձնելու պահանջով: Թուրքիայում ևս հայտարարությունը բավականին մեծ արձագանքներ է ստացել: «Առաջին լրատվական»-ի հետ զրույցում Ստամբուլում հրատարակվող «Ակօս» շաբաթաթերթի հայկական բաժնի խմբագիր Բագրատ Էստուկյանն ասաց, որ այս պահանջը կարող է շատ հետաքրքրական հետևանքներ ունենալ:
«Մինչ այս ես երբեք չեմ սպասել, որ որևէ մեկն այս հարցով պահանջատեր կլինի: Պետք է պահանջատեր լինել, պետք է բազմակողմանի պահանջներ ներկայացնել: Արամ Ա կաթողիկոսը, որպես Կիլիկիո գահակալ, իրավասու է այդ պահանջները ներկայացնել, բայց, թե որքան են իր սահմանները և որքան Պոլսո պատրիարքարանի, դա հստակ չէ»,- ասաց նա՝ շարունակելով, որ քաղաքական ռազմավարության առումով տեղին քայլ էր: Բագրատ Էստուկյանը լիահույս չէ, որ Թուրքիան ընդառաջ կգնա կաթողիկոսի պահանջին: