«Մեր անկախությունը պետք է սիրենք, փայփայենք, պահենք համերաշխ ձևով, մեկս մյուսին հարգելով, սիրելով»,- «Առաջին լրատվական»-ի հետ զրույցում ասաց «Տիգրան Մեծ» ջոկատի հիմնադիր հրամանատար Կորյուն Ղումաշյանը՝ հավելելով, որ անկախության հիմնական ձեռքբերումը նաև հզոր բանակն է, ուստի պետք է խոնարվել անկախությունը կերտողների ու նաև այսօր սահմանում կանգնած զինվորների առջև, որոնք ապացուցեցին, որ պատրաստ են հայրենիքը պաշտպանել, առաջ գնալ, իսկ ազատամարտիկներն էլ կրկին պատրաստ են ծառայել հայրենիքին, երկրի գլխավոր հրամանատարին: Ըստ նրա՝ ձեռքբերումների շարքում հիմնականներից է նաև երեխաների վաղվա ապագան, այն գիտակցումը որ իրենք ապրում են անկախ պետականության ժամանակահատվածում, ստանում են հայեցի դաստիարակություն: Ըստ հրամանատարի՝ ոչ մի քաղաքական խմորում չի կարող ստվերել անկախությունը։ «Մենք ունենք ազգ, բանակ պետություն, գաղափարախոսություն, թող շատերը չմոռանան սպարապետի այն կարգախոսը, որ ասում էր, որ եթե ամեն մեկս մի մոմ վառենք, երկիրը խավարից կհանենք։ Մենք փորձում ենք ամեն օր մոմ վառել, թող հետևեն մեզ՝ մոմ վառեն, ոչ թե մոմերը հանգցնեն այս երկրում, դա վերաբերում է որոշ իշխանականների, դա վերաբերում է և փառամոլ անհատների, որոնք տինդիրիտներ են անում այս երկրում»,- եզրափակեց նա:
Մեզ հետ զրույցում մարտի դաշտում հայտնի Չուգոն Աշոտը նկատեց. «21-րդ դարը մերն է լինելու, սպարապետի խոսքերն է։ Իրոք, 21–րդ դարը մերն է լինելու, մեր ոտը տրորողի գլուխը կջարդենք»: Իսկ ազատամարտիկ Սրապիոն Գևորգյանն էլ, որը Էրդողանի երդմնակալության օրը ի հիշատակ Ցեղասպանության զոհերի դրոշ է բարձրացրել Արարատի գագաթին, ընդգծեց. «Կառավարությունը պիտի դուխ տա, որ կռված տղաների ձեռք բերածը կարողանան ճիշտ պահել, առաջ տանել, եթե կռված տղաներին մոռանում են, երիտասարդները կասեն, եթե կռովողներին են մոռացել, մենք ինչ անենք, պիտի կռվող տղաներին դուխ տան, ոգևորեն, հիշեն։ Ճիշտ մոտեցում է պետք, որպեսզի երիտասարդները երկրից չգնան»:
Առավել մանրամասն՝ տեսանյութում։
