Մոսկվայի նախկին քաղաքապետ Լուժկովի ձեռքից մտադիր են խլել Գագրայի ստալինյան ամառանոցը: Այս մասին, ըստ Новости-Грузия գործակալության, հայտնում է Life News կայքը:
Կայքի տվյալներով, Աբխազիայի պաշտպանական գերատեսչության ղեկավար Մերաբ Քիշմարիան հաստատել է փաստը, որ Լուժկովը Գագրայից Սուխում ընկած հատվածում մի քանի անշարժ գույք ունի: «Քանի որ այդ հողերը պետական նշանակության են, պետք է հանձնվեն աբխազական կառավարության տնօրինմանը»,- հայտարարել է Քիշմարիան:
Նա հայտնել է, որ Լուժկովին են պատկանում Գագրայի ստալինյան ամառանոցը, «Ամրա» առողջարանը, «Գագրիպշ» և «Կոլխիդա» հանգստյան տները, ինչպես նաև Գագրայի ծովափնյա մի զգալի հատված, Սուխումի «Ռիցա» և «Աբխազիա» հյուրանոցները և քաղաքի կենտրոնում մի մեծ հողակտոր, որի վրա կառուցվում է զվարճանքների կենտրոն և գոլֆի ակումբ: Այդ անշարժ գույքը, ըստ Քիշմարիայի, Լուժկովը ստացել է օգտագործելով իր վարչական լծակները: «Միակ բանը, որը նվիրատվություն է Աբխազիայի կառավարության կողմից, Գագրայում մի հողատարածք է»,- նշել է աբխազ պաշտոնյան:
ՌԴ ԱԳՆ-ում Life News-ի աղբյուրները հաստատել են, որ ռուսական կառավարությունը մտադիր է վերադարձնել Աբխազիայի իր սեփականությունը: «Այն հողատարածքները, որոնք պետական են եղել ու այնուհետև ոչ պատշաճ կերպով յուրացվել են մասնավոր անձանց կողմից, կվերադարձվեն Ռուսաստանի ու Աբխազիայի կառավարություններին»,- ասել են ՌԴ ԱԳՆ-ից: Նրանք նաև ավելացրել են, որ աբխազական կողմին կանցնեն այն առողջարանները, որոնք մեծ ներդրումներ չեն պահանջում, իսկ մյուսները կմնան որպես Ռուսաստանի սեփականություն: