Հայ ազգային կոնգրեսի վերջին հանրահավաքից հետո իշխանությունը տպավորված էր և նույնիսկ երկխոսության եզրեր էր նկատել Լևոն տեր-Պետրոսյանի ելույթում։ Այնինչ իշխանությունը հերթական անգամ մերժեց Ազատության հրապարակում հանրահավաք անցկացնելու ընդդիմության պահանջը։
Այսօր ՀՀԿ ԱԺ պատգամավոր ՀովհաննեսՍահակյանից փորձեցինք ճշտել, թե այս դեպքում, ո՞րն է մերժման պատճառը։
«Երևանի այս կամ այն հատվածում հանրահավաք արտոնելը իրավական տեսանկյունից վերապահված է քաղաքապետարանին, և նա է որոշում այդ օրը այդ ժամին իրականացնել, թե ոչ»։
Մեր այն դիտարկմանը, թե դա իրավական տեսանկյունից, իսկ մյուս բոլոր տեսանկյունները կառավարվում են մի կետից` արձագանքեց. «Այո, ես հասկանում եմ դիտարկման ենթատեքստը։ Բայց չեմ կարծում, որ եթե քաղաքական ուժը այստեղ ասելիք ունի, պետք է կրկնեմ իմ գործընկերներին և ասեմ, որ եթե ՀԱԿ-ը կամ որևէ այլ ընդդիմադիր ուժ ասելիք ունի, ապա չեմ կարծում, որ չկարողանան ասելիքը տեղ հասցնել Մատենադարանի հարթակից։ Եվ չեմ կարծում, որ եթե Ազատության հրապարակում հանրահավաք անեն մեր ընդդիմադիր գործիչները, ոսկե մանանա են երկնքից իջեցնելու ժողովրդի համար։ Առավել ևս, երբ հաշվի առնելով, որ ընդդիմադիր գործիչներից մեկը հացադուլ է անում Ազատության հրապարակում`թույլատրվեց մտնել Ազատության հրապարակ հիմնական հանրահավաքից հետո, բայց այնտեղ արտառոց ոչինչ չեղավ` էական առաջարկություն, գործողությունների ականատես չեղանք, ոչ էլ հասկացանք, որ կարող է լինել»։