ՀԱԿ մամուլի խոսնակ Արման Մուսինյանը, այսօր անդրադառնալով Գագիկ Ծառուկյանի հարցազրույցին, այն դիտարկմանը, որ հարցազրույցում Գագիկ Ծառուկյանը Սերժ Սարգսյանին նախագահ չի ասել, նշել է, որ սա արդեն որոշակի վկայությունն է այն իրողության, որ ԲՀԿ-ն քառյակի ուժերի հետ համատեղ՝ ՀԱԿ-ի, «Ժառանգության», ՀՅԴ-ի հետ, ըստ էության կոնսոլիդացված գնում է քառյակի ձևավորած օրակարգի իրականացման ուղղությամբ:
Հարցազրույցում, նրա խոսքով, սպառիչ տրվել են շատ հարցերի պատասխաններ:
Նրա դիտարկմամբ՝ իրենց գործընկեր ԲՀԿ-ն, ըստ էության, իր գործողություններով տևական ժամանակ կանգնած է հասարակության և ոչիշխանական ուժերի կողքին:
Աշնանը, նրա խոսքով, քաղաքական այն ուժերը, որոնք կկանգնեն Սերժ Սարգսյանի վարչախմբի կողքին, ի վերջո հայտնվելու են քաղաքական աղբանոցում, նրանք, ովքեր կկանգնեն ժողովորդի կողքին, կլինեն Սերժ Սարգսյանի իշխանությունից ազատ առաջատար ուժեր:
Հարցին ի պատասխան, թե հանրությունը դժգոհ է ընդդիմության պասիվ կեցվածքից, Արման Մուսինյանը շատ զարմացավ. «Դուք խոսում եք ընդդիմության պասիվությունի՞ց: Նայեք, թե միայն այս տարի ընդդիմությունը ինչերի է հասել: Այս տարի կարողացանք ստիպել վարչախմբին փոխել իր մոտեցումները կուտակայինի հարցի շուրջ, նահանջել: Երկրորդ՝ շուրջօրյա հանրահավաքի սպառնալիքի ներքո կարողացանք հասնել նրան, որ պաշտոնից հեռացվեց Տիգրան Սրագսյանը, որը Հայաստանի տնտեսության կործանման երկրորդ գլխավոր պատասխանատուն է Սերժ Սարգսյանից հետո: Եթե դուք այս բոլորը համարում եք քաղաքական պասիվությո՞ւն…»,- ասաց Մուսինյանը:
Նա նշեց, որ քառյակի պահանջները չեն իրականացվել, և հիմա քառյակը կամփոփի, որ այդ պահանջները չեն կատարվել և կսկսի իշխանության դեմ պայքարի էլ ավելի ակտիվ և հրապարակային գործընթաց:
Արդյոք Տիգրան Սարգսյանին Հովիկ Աբրահամյանով փոխարինելը ընդդիմության կարևոր հաղթականերից մե՞կն է: Ի պատասխան՝ նա նշեց, ոստիկանապետի խայտառակ ելույթից հետո հասնեն նրան, որ ոստիկանապետը հրաժարական տա և նրա փոխարեն այդ պաշտոնին նշանակեն մեկ այլ՝ ավելի օդիոզ կերպար: Դա չի նշանակի, որ մենք դա կներկայացնենք, որ դա եղավ ավելի լավ: «Մենք իշխանությանը կամաց-կամաց հարվածներ ենք հասցնում և սեղմում ենք կոճակը Սերժ Սարգսյանի շուրջ: Նրան մնացել է մեկ պայմանական հաղթաթուղթ՝ սահմանադրական բարեփոխումները: Մենք կձախողենք Սերժ Սարգսյանի այս պլանը»,- ասաց նա՝ հավելելով, որ հասնելով Տիգրան Սարգսյանի հրաժարականին՝ իրենք թուլացրին Սերժ Սարգսյանի վարչախմբին:
«Թե ում են նշանակել՝ մեզ բացարձակ չի հետաքրքրում»,- ասաց նա:
Սերժ Սարգսյանին ումո՞վ կփոխարինեն հարցին էլ պատասխանեց, որ կլինեն ընտրություններ, ամեն կուսակցություն կառաջադրի իր թեկնածուին: «Շատ մեծ հավանական եմ համարում, որ մենք չենք հասնի հերթական ընտրությունների»,- ասաց նա:
Լուսանկարը՝ Pan Photo-ի
