ԲՀԿ-ն ու ՀԱԿ-ը փորձում են 2017-2018թթ. ընդառաջ պահել էլեկտորատը: «Առաջին լրատվական»-ի հետ զրույցում այս մասին ասաց քաղտեխնոլոգ Կարեն Քոչարյանը՝ անդրադառնալով աշնան քաղաքական հեռանկարներին ու ֆորսմաժորային զարգացումների հնարավորությանը:
Կարեն Քոչարյանը վստահությամբ նշեց, որ երկրի ներսում ֆորսմաժորային իրավիճակի ռեսուրս չկա: Ըստ նրա՝ համաշխարհային փորձն Ուկրաինայում, Եգիպտոսում, Լիբանանում ցույց է տալիս, որ այդ երկրներում ֆորս-մաժորի ներքին նախադրյալներ չեն եղել, բայց արտաքին միջամտության հետևանքով ֆորս-մաժոր է առաջացել: Ուստի, Կարեն Քոչարյանի համոզմամբ, Հայաստանում հասարակական ընդվզման ռեսուրս այս պահին չկա:
«Եթե լինի արտաքին միջամտություն, ապա միգուցե համաձայնվեմ, որ կլինի ֆորս-մաժոր, իսկ մնացած բոլոր պարագաներում, իմ սուբյեկտիվ կարծիքով, ֆորս-մաժորի հնարավորություն չկա»,- ասաց նա:
Հարցին՝ կա՞ն արդյոք արտաքին նախադրյալներ, Կարեն Քոչարյանը պատասխանեց, թե հավանական չէ, որ Ռուսաստանը կամ Արևմուտքը թողնեն ամեն ինչ ու սկսեն «թիթեռ նկարել» Հայաստանում, քանի որ կա ուկրաինական ճգնաժամ, բավականին լուրջ լարվածություն Եվրոպայի և Ռուսաստանի միջև, առջևում՝ ձմեռ, երբ բարձրանում է երկկողմ էմբարգոների խնդիրը, որտեղ արդեն ինչ-որ առումով կմիջամտեն մի կողմից՝ ԱՄՆ-ը, մյուս կողմից՝ Չինաստանը:
«ԲՀԿ-ն, ՀԱԿ-ը քաղաքական ուժեր են, որոնք հասկանում են, որ այս տարի, մյուս տարի չկան ընտրություններ, ինչը քաղաքական ուժերի դրսևորման ամենալավ հնարավորությունն է, բայց հասկանալով, որ չի բացառվում սահմանադրական բարեփոխումների հանրաքվեն, մտածում են դա օգտագործել որպես միջանկյալ առիթ՝ մինչև 2017-2018թթ. ընտրությունները պահպանելու վարկանիշը, ընտրազանգվածը: Պարզից էլ պարզ է, որ բոլոր քաղաքական ուժերը պատրաստվում են 2017-2018թթ. ընտրություններին: Բոլորս ենք հասկանում՝ երբ չկան ընտրական գործընթացներ, քաղաքական ուժերն ինչ-որ առումով պետք է փորձեն պահել էլեկտորատը»,- մեկնաբանեց Կարեն Քոչարյանը:
Անդրադառնալով «Հատուկ համահավաք ջոկատի կիրառումը զանգվածային անկարգությունների կանխման և խափանման օպերացիայում» թեմայով հրամանատարաշտաբային վարժանքի ամփոփիչ գործողությանը, որը մի շարք քաղաքական գործիչների կողմից որակվեց որպես նախազգուշական գործողություն, քաղտեխնոլոգ Կարեն Քոչարյանն ասաց. «Եթե փորձենք փնտրել քաղաքական ենթատեքստ, ապա կտեսնենք իշխանության քաղաքական պատասխանը: Չորս ուժերն ասում են՝ կանցկացնեն հանրահավաք, իսկ ոստիկանությունը պատասխանում է, որ սառը ցնցուղով կցրի: Սովորական փոխհրաձգություն է»:
Հիշեցնենք, որ օրերս ԲՀԿ ներկայացուցիչ Վահե Հովհաննիսյանը մեկնաբանելով ԲՀԿ առաջնորդ Գագիկ Ծառուկյանի հարցազրույցում տեղ գտած մի շարք մտքեր՝ ասաց, որ ԲՀԿ-ն պատրաստ է ցանկացած ֆորսմաժորային զարգացման, թեև ելնում են 2017-2018թթ. ընտրություններից:
Լուսանկարը՝ Pan Photo-ի
