Այսպիսով, քննչական կոմիտեն արդեն լիարժեք է: Ուրբաթ օրը Սերժ Սարգսյանը հրամանագրեր է ստորագրել քննչական կոմիտեի նախագահի չորս տեղակալներ նշանակելու մասին: Տեղակալներից մեկը Արթուր Ղամբարյանն է, որը մինչև նախորդ տարեվերջ Գլխավոր դատախազության իրավական ապահովման բաժնի պետն էր: Մյուս երեք տեղակալներն են Արամ Թամազյանը, որը մինչ այդ գլխավոր դատախազի տեղակալն էր: Երրորդ տեղակալը մարտի 1-ի գործի քննչական խմբի նախկին ղեկավար Վահագն Հարությունյանն է, և վերջինը՝ ՊՆ քննչական ծառայության պետ Արմեն Հարությունյանը: Վերջինս կհամատեղի նաև ՔԿ զինվորական քննչական գլխավոր վարչության պետի, իսկ Վ. Հարությունյանը՝ հատկապես կարևոր գործերի քննության գլխավոր վարչության պետի պաշտոնը: Հարկ է նկատել, որ տեղակալները բոլորն էլ Սերժսարգսյանական կադրեր են: Արամ Թամազյանը Աղվան Գառնիկիչի հետ տասնյակ տարիների աշխատելու փորձ ունի: Վահագն Հարությունյանը մեկ անգամ չէ, որ խրախուսվում է մարտի 1-ի գործը հաջողությամբ փակուղի տանելու համար: Արմեն Հարությունյանը նույնպես «հին գել» է համարվում, և Գևորգ Կոստանյանի գլխավոր դատախազ նշանակվելուց հետո հենց նա էր համարվում զինդատախազի ամենահավանական թեկնածուն, քանի որ նույնպես վայելում է Սերժ Սարգսյանի հովանավորչությունը: Ինչ վերաբերում է Արթուր Ղամբարյանին, ապա միայն նա է, որ հանրության և ոլորտի ներկայացուցիչների մոտ հայտնի է որպես իրավաբան-գիտնական:
Իրավապաշտպան Ավետիք Իշխանյանն առանձնապես մեծ սպասելիքներ չունի այս նոր կառույցից, ոչ էլ նշանակումներից: Քննչական կոմիտեի նախագահի տեղակալների նշանակումը նա բնութագրում է հայտնի խոսքով. «Նոր գինին հին տիկերում չեն պահում: Մենք տեղակալների պաշտոնում տեսնում ենք հին մարդիկ, ովքեր իրենց ողջ գործունեությամբ հանրությանն արդեն ծանոթ են: Ընդ որում՝ ծանոթ են ոչ դրական առումով: Հանրությունը նրանց ծանոթ է որպես տարբեր գործերով իշխանության կամակատարներ, որոնք այդ գործերին տվել են ոչ թե կոնկրետ լուծումներ, այլ ընդամենը կատարել են վերևից իջեցված քաղաքական պատվերներ»,- «Առաջին լրատվական»-ի հետ զրույցում ասաց Իշխանյանը՝ հավելելով. «Ես սպասում էի՝ իրականում անկախ կառույց կլինի, բայց ինչպես տեսնում ենք, Հայաստանում շատ կառույցներ հորջորջվում են անկախ, բայց իրականում մեկը մյուսին շղթայված կառույցներ են, որը երբեմն բերում է շահերի բախման: Այսինքն՝ ուզում եմ ասել, որ այդ նոր կոչված կառույցը բոլորովին էլ նոր չէ, այլ նախորդների շարունակությունը: Դրա ապացույցն էլ տեղակալների նշանակումն է: Այդքանից հետո սպասել, որ այդ կառույցն անկախ կգործի և կծառայի օրենքի շահին և օրենքի տառին համապատասխան, ես ինքս չեմ հավատում»:
Այնուամենայնիվ, Իշխանյանի խոսքով, Հայաստանի քաղաքական համակարգն իմանալով կարելի է ասել, որ այս կառույցն ավելի հզոր է լինելու, քան ոստիկանությունը, բայց չի կարողանա ինքնուրույն որոշում կայացնել այս կամ այն գործով: «ՀՔԾ-ն, դատախազությունը նույնպես անկախ կառույցներ են, բայց մենք երբեք չենք տեսել նրանց անկախությունը, այլ միշտ ականատես ենք եղել քաղաքական պատվերների կատարման»:
Միջազգային իրավունքի մասնագետ, իրավաբան Արա Ղազարյանը, հակառակը, կարծում է, որ այդ շահերի բախումը, զսպումների ու հակակշիռների մեխանիզմը կբերի ավելի լավ արդյունքի: «Իշխանությունների բաժանման սկզբունքը շատ ավելի լավ է աշխատում: Շատ ավելի լավ է, երբ հանցագործներին բռնելը և նախաքննությունը առանձին մարմիններ են անում, որովհետև կառույցը կաշկանդված չի լինի, ասենք, ոստիկանության հետաքննիչների արած սխալներով: Նոր քննչական կոմիտեի ստեղծմամբ մենք կունենանք տարբեր մարմիններ, որոնք կաշկանդված չեն լինի գործի քննությամբ, որում, ասենք, ոստիկան է ներգրավված»,-ասաց Արա Ղազարյանը՝ հավելելով, որ այդքանից հետո մնում է միայն, որ ստվերային մեխանիզմները չաշխատեն, ինչի վտանգը կա: «Ինքնին երևույթը լավ է, որ առանձին քննչական կոմիտե կա, բայց վատ է, որ մի քանի կառույցների քննչական մարմինները դուրս մնացին այս կառույցից, որը բացառապես քաղաքական որոշման արդյունք էր: Բայց ամեն դեպքում լավ է այն իմաստով, որ այլևս չի լինի գերատեսչական շահ ասվածը»,- եզրափակեց Ղազարյանը:
